Umusore abanza kurwana n’ikimasa yatsinda akabona kubona umukobwa bakundana

Muri icyo gihugu mu gace kitwa Betsileo, kuva kera bategura amarushanwa yitwa “Savika” aho abagabo bashaka abakobwa bakundana, bazagira abagore, babanza kurwana n’ibimasa.

Nk’uko bigaragara mu nkuru ya Video yakozwe n’igitangazamakuru cya BBC, iryo rushanwa ribera ahantu habugenewe maze abakobwa n’abandi bantu bakaza kureba uburyo abasore bahangana n’ibimasa bifite amahembe n’ipfupfu.

Buri musore ahangana n’ikimasa kimwe, akagifata ku ipfupfu akahakomeza, ikimasa kikamuteragura hejuru, abantu bareba, bogeza banavuza ingoma.

Uwo mukino ubera ahantu habugenewe abantu bakaza kureba bogeza

Umusore yegukana intsinzi iyo yakomeje guhangana n’icyo kimasa, akagikomeza kugeza igihe kinaniriwe kikaryama hasi. Gusa ariko iyo kimukomerekeje umukino urahagarara.

Icyo gihe uwo musore afatwa nk’intwari muri ako gace, akabengukwa n’inkumi nawe agahitamo iyo ashaka azagira umugore.

Uwo mukino wo gukirana n’ikimasa ntiworoshye kuko ngo kuva watangira umaze gupfiramo abantu babarirwa muri 50.

Abakobwa nabo baba baje kwihera ijisho uburyo abasore barwana n’ibimasa. Iyo umusore atsinze ahitamo umukobwa bakundana

Muri iyo Video ya BBC hagaragaramo umusore witwa Andy Rafanambinantsoa, ufite imyaka 27 y’amavuko ariko utarashaka umugore kuko yarwanye n’ikimasa ntabashe kugitsinda.

Avuga ko yizeye gutsinda mu irushanwa ritaha nawe akabasha kubona uwo azagira umugore.

Akomeza avuga ko kugira umugore muri ako gace ari ikintu gikomeye cyane kuko ngo utagira umugore, abana n’umuryango bifatwa nko gusuzuguza ise umubyara.

Andy Rafanambinantsoa umwe mu basore barwanye n’ikimasa agatsindwa avuga ko yizeye kuzatsinda akabona umugore