Perezida Kagame avuga ko Afurika yazize kudashyira hamwe ngo bakoreshe indangagaciro za Kinyafurika mu kwishakamo ibisubizo, ahubwo bagategera amaboko abandi babashakiye ibisubizo.

Yagize ati “Mu myaka mike ishize Afurika n’ibihugu bya Aziya byari ku rugero rumwe rw’iterambere, ariko byo byarakataje twe turasigara. Dukwiye kwibaza impamvu byegenze gutyo kandi tugahindura imikorere.”

Igisubizo cya Perezida Kagame ku cyatumye Afurika idindira mu iterambere, ngo ni uko Abanyafurika bemereye abandi batari Abanyafurika kubakoreraho igerageza ariko bikarangira ntacyo ritanze Afurika ikiri hahandi.

Yatanze urugero rw’inkiko za Gacaca mu Rwanda nka kimwe mu bisubizo by’ibibazo bikomoka kuri Jenoside yakorewe Abatutsi mu 1994, avuga ko iyo itabaho kuburanisha imanza za Jenoside bitari kuzarangira.

Ati “Nk’urugero (mu Rwanda), byari kuzatwara imyaka amagana kugira ngo tuburanishe abakurikiranyweho ibyaha bya Jenoside. Mu Rwanda twakoresheje uburyo gakondo mu kurangiza izo manza, bidufasha kuburanisha imanza imanza ibihumbi n’ibihumbi kandi binageza ku bwiyunge.”

Perezida Kagame yavuze ko uburyo u Rwanda rwakoresheje butandukanye n’ubwo Umuryango w’Abibumbye wakoresheje ingengo y’imari itabarika mu myaka 20 ikaburanisha imanza zitarenze 62.

Ibyo byahise bigeza Perezida Kagame ku kubazo kigira kiti: “Kuki Afurika yahora ibeshejweho n’ubugiraneza bw’abanyamahanga?”

Yahise atanga urugero ahereye mu nama yari yitabiriye ati “Muri iki cyumba harimo abantu baturutse ahantu hatandukanye, bize muri za kaminuza mu mahanga zitandukanye. Kuki tutakoresha ubwo bumenyi ngo duhindure ibibazo dufite?

Abanyafurika dufite ubushobozi bwose bushoboka ngo duteze imbere umugabane wacu imbere.”

Mu rugendo rwa Perezida Kagame muri Cote d’Ivoire hasinywe amasezerano atandukanye y’ubufatanye mu by’ubucuruzi ndetse n’ubuhahirane.