KT TV
Kenya: Umwe mu bigaragambya yishwe, abandi babiri barakomereka
Muri Kenya, ahitwa Kisumu, umuntu umwe yarashwe na Polisi nyuma aza gupfa azize ibikomere mu gihe abandi babiri bo bakomeretse bakajyanwa mu bitaro, ubwo bari mu myigaragambyo yo kwamagana izamuka ry’imisoro.
- Polisi yo muri Kenya yarashe umwe mu bari mu myigaragambyo arapfa
Uwo mugabo yarashwe ku munsi w’ejo ku wa Gatanu tariki 7 Nyakanga 2023, umunsi wiswe ‘Saba Saba Day’ waranzwe n’imyigaragambyo mu guce dutandukanye tw’aho muri Kisumu.
Abo bantu babiri bakomerekejwe n’amasasu, ngo bahise bajyanwa mu bitaro bya ‘Jaramogi Oginga Odinga Teaching and Referral Hospital (JOOTRH)’ aho barimo gukurikiranwa n’abaganga.
Nk’uko byatangajwe n’Ikinyamakuru ‘The Citizen’ cy’aho muri Kenya, umuyobozi w’Ibitaro bya JOOTRH Alex Ochieng, yavuze ko iyo myigaragambyo nyakwigendera yarasiwemo, yabereye ahitwa Obunga, aho bivugwa ko yarashwe na Polisi.
Ochieng yavuze ko abo bantu babiri bakomeretse bakanwa mu bitaro aho barimo kuvurwa n’abaganga, umwe yarashwe mu gatuza, arasiwe ahitwa i Kondele, mu gihe undi yarashwe ku kuguru, arasiwe ahitwa Chulaimbo, aho hombi hakaba ari muri Kisumu.
Ochieng yasoje avuga ko abo bakomeretse bombi, bategereje kubagwa mu rwego rwo kuvurwa neza muri ibyo bitaro barimo.
Ibitekerezo
Ohereza igitekerezo
|
|
