Muri uyu muganda wabaye ku munsi mpuzamahanga wo kurengera ibidukikije, ingabo z’u Rwanda zateye ibiti 300 kuri kaminuza ya El Fasher. Bakoze n’isuku banatoragura amashashi yari anyanyagiye hirya no hino mu mujyi wa El Fasher, Umurwa Mukuru w’Intara ya Darfur.

Ingabo z’u Rwanda zari mu gikorwa cy’umuganda zakoze n’isuku zikuraho amashashi yari yandagaye hirya no hino.

Mu banyacyubahiro bitabiriye uwo muganda barimo uwungirije Guverineri w’Intara ya Darfur y’Amajyaruguru, Mr Abu Abas, Umuyobozi w’Ingabo z’u Rwanda ziri mu butumwa bw’amahoro Darfur, Col Sam K BAGUMA n’abandi benshi, nk’uko urubuga rwa MINADEF y’u Rwanda rubitangaza.

Ingabo z’u Rwanda kandi zanateye ibiti mu rwego rwo kubungabunga ibidukikije.

Uwungirije Guverineri w’Intara ya Darfur y’Amajyaruguru, yashimiye Ingabo z’u Rwanda kuba bitabiriye icyo gikorwa ari benshi no kuba bahangayikishijwe no kuba ahari h’ubutayu hahinduka ahantu heza hari ibimera.

Deputy Wali, wungirije Guverineri w’umurwa mukuru wa Darfur yashimye ingabo z’u Rwanda.

Yagize ati “Mu byukuri nyuma yo kuba muri mubutumwa bwo kubungabunga amahoro, bigaragara ko muhangayikishijwe na none no kubungabunga ibidukikije byacu.”

Kigali Today