Afurika y’Epfo ni cyo gihugu gifite ubanduye icyorezo covid-19 benshi kurusha ibindi bihugu byo ku mugabane wa Afurika.

Mu minsi ishize Leta yatangaje ko yashyizeho itsinda ry’abaganga barenga ibihumbi 11, bo kuzenguruka urugo ku rundi bapima abaturage bareba abanduye, aho bishoboka bakagezwa kwa muganga, abandi bagashyirwa mu kato mu ngo zabo.

Minisitiri w’Ubuzima, Zweli Mkhize, yavuze ko kugeza ubu bamaze gupima abantu ibihumbi 47, 541, ariko avuga ko akurikije uburyo iyi virus yiruka cyane, bakeneye gushyiramo imbaraga zirenze izo bari gukoresha.

Yagize ati “ Keretse nitwongera umuvuduko naho ubundi twese tuzandura mugihe cya vuba”.

Yongeyeho ko mu kwezi kwa gatanu kurangwa n’ibicu n’imvura n’ubukonje bukabije, uburyo ibicurane bikunze kwibasira abantu beshi cyane, Coronavirus na yo ikaba ikwira cyane mu gihe cy’ubukonje, avuga ko biteguye ko ibitaro n’ibigo nderabuzima bizaba byuzuye abarwayi ba Coronavirus.

Ati “Mu gihe cy’ubukonje tugiye kwinjiramo ibintu bizarushaho kuba bibi cyane, ibitaro bishobora guterwa n’umwuzure utari uw’amazi ahuwo ari uw’abarwayi ba coronavirus”.

Kugeza ubu imodoka zirenga 67 zuzuye ibikoresho byo gupima zoherejwe mu gihugu hose, kdi abaganga ntabwo bazongera gutegereza ko abaturage baza kwipimisha babasanze kwa muganga, ahubwo ni igihe cyo kubasanga aho bari.

Ikoranabuhanga bari kwifashisha rishobora gutuma mu cyumweru gitaha bashobara kugera ku rwego rwo gupima nibura abantu ibihumbi 30,000 ku munsi.

Kugeza ubu abantu bane bamaze kwicwa na covid-19, mu gihe abantu barenga 1,400 na bo bamaze kuyandura.