Umuyobozi Mukuru wa NISR, Ivan Murenzi, yavuze ko ubwiyongere bw’uruhare rw’ubuhinzi mu musaruro mbumbe w’Igihugu, bwatewe n’ibihingwa ngengabukungu byoherezwa hanze.

Ati “Urebye mu mibare ubona ko uruhare runini ari urw’ibihingwa byoherezwa mu mahanga byiyongereye ku rugero rwa 42% muri iki gihembwe, wareba neza ukabona ko ikawa yagizemo uruhare runini cyane ugereranyije n’ibihingwa ngandurarugo, umusaruro wabyo wari muke, kuko byiyongereye ku rugero rwa 3% gusa.”

Umusaruro w’ibihingwa byohererezwa mu mahanga wazamutseho 42%, bitewe n’izamuka rya 121% ry’umusaruro wa kawa, ryaturutse ku bicuruzwa byitwaye neza ku isoko mpuzamahanga, ndeste n’imbaraga zashyizwe muri gahunda yo gusimbuza ibiti bishaje bya kawa n’iyo gusazura ibihari, kukomu myaka ine ishize, umusarurow’ikawa ngo wari hasi cyane, kuko hari harabayehogahunda yo gutera ibiti bishya.

Inganda zagize uruhare rwa 7% mu musaruro mbumbe w’Igihugu, umusaruro wazo ukaba warazamutse bitewe ahanini n’izamuka rya 10% ry’umusaruro w’inganda zitunganya ibiribwa, izamuka rya 19% ry’umusaruro w’inganda zikora ibikoresho by’ibyuma, imashini n’ibikoresho byazo, izamuka rya 24% ry’umusaruro w’inganda zikora ibikoresho bitari ibyuma, cyane cyane ibya pulasitiki n’izindi.

Minisitiri w’Imari n’Igenamigambi, Yusuf Murangwa, avuga ko hari byinshi birimo gushyirwamo imbaraga kugira ngo umusaruro w’inganda ukomeze kuzamuka.

Ati “Turimo gushaka uko twongera umusaruro by’umwihariko uw’inganda, kuko mu bihugu bimwe inganda zikora amasaha 24, bakabyaza umusaruro amahirwe y’ibiciro by’amashanyarazi biri hasi mu gihe abantu baba batayakoresha cyane, bagakora mu ijoro, ariko kugira ngo bigerwego hari ibindi biba bikenewe nka serivisi z’ubwikorezi na resitora na zo zakora muri ayo masaha.”

Muri rusange, umusaruro mbumbe w’Igihugu wageze kuri Miliyari 5.798Frw mu gihembwe cya kabiri cy’uyu mwaka, bigaragaza izamuka rya 7.8%, mu gihe wari wazamutseho 6.5% mu gihembwe cya mbere nanone cy’uyu mwaka.

Reba ibindimuri iyi video: