Ubufatanye bwa Leta n’abikorera, inkingi ikomeye mu guteza imbere ikoranabuhanga mu burezi bw’u Rwanda

Yanditswe na

Ruzindana Janvier

27-07-2026 - 01:26' | Ibitekerezo ( )

Mu myaka icumi ishize, u Rwanda rwabaye kimwe mu bihugu bya mbere muri Afurika mu guteza imbere ikoranabuhanga, rushora imari igaragara mu miyoboro y’itumanaho, ibikorwa remezo by’ikoranabuhanga, ndetse n’ikoranabuhanga mu burezi. Ibi byatumye habaho umuryango ukomeye w’abahanga n’abashoramari mu bijyanye na EdTech, batanga ibisubizo bishya bigamije gukemura ibibazo bitandukanye mu burezi

Ibi bisubizo birimo uburyo bwo gutanga amasomo hifashishijwe ikoranabuhanga, kongerera ubushobozi abarimu binyuze mu mahugurwa agezweho, gutanga ubumenyi ngiro bujyanye n’isoko ry’umurimo, gusuzuma no gukurikirana imyigire y’abanyeshuri, ndetse no gutanga amasomo ajyanye n’ubushobozi n’ibyifuzo bya buri munyeshuri ku giti cye.

Ibi byose bigaragaza uruhare runini ikoranabuhanga rifite mu kuzamura ireme ry’uburezi no gutegura ejo hazaza h’u Rwanda rishingiye ku bumenyi n’udushya.

Nubwo hari intambwe igaragara imaze guterwa, ibisubizo byinshi by’ikoranabuhanga mu burezi bikorerwa mu Rwanda, bigirwamo uruhare n’Abanyarwanda ndetse n’abafatanyabikorwa batandukanye, biracyahura n’imbogamizi zituma bitagera ku rwego rwifuzwa.

Zimwe muri izo mbogamizi zirimo kubura ubufatanye buhamye n’inzego za Leta, kudahuza mu buryo bwo kugura no gukoresha ibi bisubizo, kubura ubushakashatsi buhagije bwemeza imikorere n’akamaro kabyo, ndetse n’ikibazo cy’amikoro make ku bafite imishinga itandukanye. Izi mbogamizi zituma udushya twinshi tutagera ku ntego uko bikwiye cyangwa ngo tugere ku banyeshuri n’abarimu mu buryo bwagutse.

Gukemura ibi bibazo bisaba ubufatanye burushijeho kandi bufite imbaraga hagati ya Leta n’abikorera. Leta ifite uruhare rukomeye mu gushyiraho politiki zorohereza ishoramari, gufasha mu ikoreshwa ry’ikoranabuhanga mu mashuri na za Kaminuza, no gushyiraho amabwiriza arengera ubuziranenge bw’iryo koranabuhanga.

Amashuri Makuru na za Kaminuza na byo bifite uruhare rukomeye mu gushyigikira ubushakashatsi, kwemeza no kugenzura ikoranabuhanga rishya, guteza imbere ubucuruzi bushingiye ku bumenyi, no gutegura abanyeshuri bafite ubumenyi bujyanye n’isoko ry’umurimo.

Mu gihe u Rwanda rukomeje intego yo kuba igihugu gishingiye ku bumenyi no ku guhanga udushya, ubufatanye hagati ya Leta, amashuri, n’abikorera ni ingenzi cyane kugira ngo ikoranabuhanga mu burezi rikorerwa imbere mu gihugu ritere imbere, ryaguke ku rwego rw’Igihugu no ku rwego mpuzamahanga.

Iyi gahunda igamije kurebera hamwe ingamba zafasha kunoza ubufatanye, kongera amahirwe yo gukoresha ibi bisubizo, gushaka ishoramari, no kubaka urwego rw’ikoranabuhanga mu burezi rutanga umusaruro ugaragara mu myigire y’abanyeshuri no mu iterambere rusange ry’igihugu.

Muri rusange, hari ukwemera ko nta ruhande rumwe rwonyine rwahindura urwego rw’uburezi kuko kugira ngo habeho impinduka zirambye, bisaba ubufatanye buhamye, icyizere, imikoranire irambye hagati ya Leta, amashuri n’abahanga mu ikoranabuhanga, hagamijwe gukoresha neza amahirwe yose ari mu ikoranabuhanga mu burezi bw’u Rwanda.

Ibi byose nk’uko bigamije guteza imbere ikoranabuhanga ryifashishwa mu burezi bw’u Rwanda, bizaganirwaho mu kiganiro ngarukakwezi cya #EdTechMondays kizaba kuri uyu wa Mbere tariki 27 Nyakanga 2026, kikazaba gifite insanganyamatsiko igira iti: "Ubufatanye hagati ya Leta n’Abikorera mu Guteza Imbere Ikoranabuhanga mu burezi ryakorewe mu Rwanda."

Iki kiganiro kizatambuka saa 18h00 -19h00 kuri KT Radio 96.7FM ndetse no ku muyiboro wa YouTube wa Kigali Today. Gitegurwa ku bufatanye bwa Mastercard Foundation n’Urwego rushinzwe Ikoranabuhanga mu Rugaga rw’Abikorera (Rwanda ICT Chamber).