U Rwanda nka kimwe mu bihugu cyagaragayemo Jenoside yahitanye abantu beranga miliyoni bazira uko bateye, ni kimwe mu byatumye aya mahugurwa abera mu Rwanda. Ibyo bibazo binagaragara mu bihugu bikikije u Rwannda, nk’uko bamwe mu bana baturutse muri ibyo bihugu bituranye n’u Rwanda babitangaje.

Jonah Tumukunde w’imyaka 17 waturutse muri Uganda avuga ko iwabo hari amoko atandukanye kandi ko hari ibintu azwiho bijyanye no gusebanya. Akemeza ko ibyo byose bishobora kuba intandaro yo gukurura umwuka mubi hagati y’abantu.

Peace Ingabire w’imyaka 15 waturutse mu Rwanda, we yemeza ko ibyo bize bizabafasha gusobanurira urubyiruko rugenzi rwarwo ndetse n’ababyeyi babo, kuko abaturage bakunda gusebanya mu by’ukuri batazi ingaruka zabyo.

Asoza ku mugaragaro aya mahugura, kuri uyu wa kane tariki 13/12/2012, George Wamushiyi ushinzwe imari n’ibijyanye n’inkunga muri World Relief, yabasabye gusangiza bagenzi babo ibyo bize, kugira ngo babere urugero ku Rwanda na Afurika muri rusange.

Aya mahugurwa yatangiye tariki 10/12/2012 afite insanganyamatsiko igira iti: “Amahoro yacu mu buryo butandukanye, tanga amahoro, ubone amahoro”. Bimwe mu byigiwemo harimo kumenya ibijyanye n’ivangura, ibijyanye no gusebanya, n’ibijyanye no kubabarirana.

Emmanuel N. Hitimana