Mu ijambo rye, Apostle Mignonne Kabera yagize ati “Uyu munsi twishimiye guhagararana n’Akarere ka Gasabo muri iki gikorwa cyo gutangiza Itorero ry’Intore mu Biruhuko. Nk’itorero Noble Family Church, twizera ko kubaka umuryango n’Igihugu bitangirira ku kwita ku mwana. Ni yo mpamvu twiyemeje kugira uruhare mu gufasha abana b’abakobwa kugira ubuzima bwiza, kubigisha isuku, no kubafasha gusobanukirwa akamaro ko kwiyitaho. Turifuza ko nta mwana w’umukobwa wakongera guhura n’ibibazo biterwa no kubura ibikoresho by’isuku, cyangwa ngo ashukishwe n’ibyo akeneye. Buri mwana w’umukobwa akwiye kugira icyubahiro, ubuzima bwiza, n’amahirwe angana n’ay’abandi yo gukura neza no kugera ku nzozi ze.”

Apostle Mignonne Kabera yasobanuye ko ari muri urwo rwego, Noble Family Church ndetse na Wirira Women Foundation, ku bufatanye n’Akarere ka Gasabo, bateguye inkunga y’ibikoresho by’isuku bizahabwa abana b’abakobwa ibihumbi bibiri. Muri ibyo bikoresho harimo ibizwi nka ‘cotex’ ebyiri kuri buri mukobwa, impapuro z’isuku zifashishwa mu bwiherero (toilet papers) ku bahungu n’abakobwa, umuti w’isabune, amavuta yo kwisiga, umuti w’amenyo n’uburoso bw’amenyo. Byose hamwe ni ibikoresho ibihumbi bitandatu.

Apostle Mignonne Kabera avuga ko mu myaka igera kuri 20 bamaze bakorana n’Akarere ka Gasabo bagiranye imikoranire myiza, ati “Turizera ko ibi bikoresho bizabafasha gukomeza amasomo yabo, kwigirira icyizere, ndetse no kurindwa ibishuko bishobora guturuka ku kubura ibyo bakeneye.”

Yashimiye Akarere ka Gasabo ku bufatanye bwiza bwo gukomeza gushyigikira ibikorwa biteza imbere imibereho myiza y’abaturage, ashimira n’ubuyobozi bw’Igihugu butanga icyerekezo, kugira ngo isuku ikomeze kwimakazwa mu bantu binyuze muri ubwo bufatanye. Yashishikarije buri wese kugira uruhare mu kurera abana, kubarinda no kububakira ahazaza heza. Ati “iyo twita ku mwana umwe, tuba twubatse umuryango. Iyo twubatse imiryango, tuba twubatse Igihugu.”

Umunyamabanga Nshingwabikorwa w’Umurenge wa Kinyinya, Rugabirwa Deo, na we yibukije buri wese kugira uruhare mu kwita ku rubyiruko, kuruba hafi no kururinda ibikorwa bibi, haba mu gihe cy’ibiruhuko ndetse no mu gihe bari ku ishuri. Yagize ati “Intego ni uko twese tugomba gufatanya kugira ngo tubiteho muri ibi bihe by’ibiruhuko, ariko atari no muri ibi bihe by’ibiruhuko gusa, ahubwo no mu bihe byose tugomba gukurikirana abana no kubitaho, tukabaha iby’ingenzi byose bikenewe kugira ngo bazavemo abantu bazima twese twifuza, n’Igihugu cyifuza. Iyo abana bagiye mu biruhuko, turamutse turangaye gatoya bashobora guhuriramo n’ibindi bibazo. Ni yo mpamvu dusabwa kubitaho uko bishoboka kugira ngo ibiruhuko bizagende neza, birangire abana basubire ku ishuri bameze neza. Nubwo n’igihe bari ku ishuri tuba tugomba kubakurikirana, ariko iki kiba ri igihe kidasanzwe.”

Umuyobozi Nshingwabikorwa Wungirije w’Akarere ka Gasabo, Regis Mudaheranwa, yasabye urubyiruko rwitabira gahunda y’Intore mu Biruhuko kujya rwigisha abo basize mu rugo ibyo na rwo rwigiye mu itorero birimo kurwanya ubusinzi n’ibindi biyobyabwenge.

Iki gikorwa cyo kwifatanya n’Akarere ka Gasabo no gutanga ibikoresho by’isuku, kibanjirije ibiterane bya All Women Together (Abagore Twese Hamwe) birimo gutegurwa, bikazaba guhera tariki ya 11 - 15 Kanama 2026 muri BK Arena. Ni ibiterane by’amasengesho ariko bizanatangirwamo inyigisho z’uko abagore n’abandi bagize umuryango muri rusange bakora bakiteza imbere babijyanishije no gusenga ndetse no kumenya uko bahangana n’imibereho yo muri iki gihe isa n’igoye. Kwinjira muri ibyo biterane ni ubuntu ariko bisaba kwiyandikisha mbere.