Perezida Kagame yakiriye mugenzi we wa Togo n’akanama k’abahoze ari abakuru b’ibihugu

Yanditswe na

Ruzindana Janvier

30-01-2026 - 17:18' | Ibitekerezo ( )

Perezida Paul Kagame yakiriye mugenzi we wa Togo akaba n’Umuhuza Mukuru w’Umuryango wa Afurika Yunze Ubumwe mu gushakira amahoro Uburasirazuba bwa DRC, Faure Gnassingbé bagirana ibiganiro byabereye mu muhezo.

Ni ibiganiro byabereye muri Village Urugwiro, bikurikirwa n’ibyahuje aba bakuru b’Ibihugu byombi n’Itsinda ry’Impuguke ryashyizweho n’Umuryango wa Afurika Yunze Ubumwe rigizwe n’abahoze ari Abakuru b’Ibihugu byo ku Mugabane wa Afurika, harimo Olusegun Obasanjo wahoze ari Perezida wa Nigeria, na Sahle-Work Zewde wahoze ari Perezida wa Ethiopia.

Hari kandi na Festus Mogae wahoze ari Perezida wa Botswana ndetse na Catherine Samba-Panza wahoze ari Perezida wa Repubulika ya Santrafurika.

Ibiganiro byahuje impande zombi byibanze ku mutekano mu Burasirazuba bwa Repubulika Iharanira Demokarasi ya Congo, ku ntambwe imaze guterwa by’umwihariko mu biganiro binyuze muri dipolomasi bikomeje gukorwa ndetse no ku buryo hashimangirwa ubufatanye n’ihuzabikorwa mu mbaraga zose zaba iz’Uturere, iz’Afurika muri rusange mu rwego rwo kwimakaza amahoro, umutekano n’ituze mu Karere k’Ibiyaga Bigari.