Ubuyobozi bugaragaza ko indwara ziterwa n’umwanda zirimo iz’amenyo kubera umwanda wo mu kanwa, bikagorana kuzivura kuko bihenda Igihugu rimwe na rimwe n’ubushobozi busabwa umurwayi, bukabura bigatuma zirushaho gukomera.

Aho ni ho Umuyobozi w’Akarere ka Muhanga, Kayitare Jacqueline, aheraho asaba abaturage bose kugira isuku bidasabye ko bahabwa ibihano cyangwa babibwirizwa, kabone n’ubwo n’ubundi ibihano biteganyijwe.

Agira ati "Isuku ikwiye kuba umuco ku mubiri, imyambaro n’aho dukorera, aho iterambere ry’Igihugu cyacu rigeze ntabwo tukiri abo kwibutswa gukaraba, kumesa no gukubura iwacu dutuye, ari na yo mpamvu ubu hutumwa bureba buri wese kandi akabigiramo uruhare".

Yongeraho ati "Dusoze umwaka wa 2025 iwacu hakeye, uko tubisaba mu ngo, aho dutangira serivisi n’aho dukorera, bibe ikirango cy’iwacu i Muhanga".

Agaruka ku butumwa bugamije ubukangurambaga bwa Minisiteri y’Ubuzima, MINISANTE, ku isuku, Umuyobozi w’Akarere ka Muhanga wungirije ushinzwe imibereho myiza, Mugabo Golbert, agaragaza ko mu ndarwa 100 zigera kwa muganga 90 muri zo zituruka ku mwanda, bigatuma amafaranga Leta itanga yunganira abaturage mu kwivuza nibura agera ku munani ku muntu buri munsi.

Agira ati "Nibura buri rugo rugomba kugira icyobo cyo gufata amazi yakoreshejwe, ni itegeko kandi gukorana na Kampani ishinzwe gutwara imyanda, hanyuma amazi yakoreshejwe agume mu ngo, ntidushaka amazi asohoka ajya mu muhanda. Aho dukorera naho tuhagirire isuku y’umwihariko, abatazabikurikiza ni ibihano".

Asaba ko mu ngo zo mu giturage ho bagira ingarani, naho mu ngo zo mu mujyi bakirinda kumena imyanda muri ruhurura no mu dushyamba, kuko bihenda kubikumira aho Akarere kanashyiragaho igihembo cy’amafaranga ku wafata abamena imyanda hanze.

Depite Speciose Mukandanga yavuze ko mu rugendo bamazemo iminsi itandatu mu Karere ka Muhanga, basanze hari aho imyanda ishobora kubangamira abaturage, asaba Kompanyi ya AGRUNI ko ahakusanyirizwa imyanda ikurwa mu ngo, naho hitabwaho kugira ngo idahungabanya ubuziranenge bw’abahaturiye.

Yibukije kwita ku burere bw’abana mu muryango, kwirinda ihohoterwa rikorerwa abana, no kwirinda gukoresha abana imirimo ivunanye kandi bigizwemo uruhare n’ababarera cyangwa abakomisiyoneri babacuruza.

Agira ati "Ntibikwiye ko umubyeyi yohereza umwana utarageza imyaka y’ubukure mu kazi, kuko usanga ayo mafaranga umwana akorera asa n’ikiguzi kuri uwo mubyeyi, ubwo aba acurije umwana we kuko amuzanira ayo mafaranga".

Ibigo n’abikorera bakwiye gutanga umuganda ushingiye kuri serivisi

Meya Kayitare avuga ko akurikije uko ibigo by’abikorera byitabiriye umuganda w’isuku, bikwiye ko hashyirwa imbaraga mu gukora n’umuganda ushingiye kuri serivisi, nk’aho Kompanyi itwara imyanda mu mujyi wa Muhanga yatanze imodoka 10 zo gufasha abaturage gukura imyanda mu ngo.

Hari kandi ivuriro rya Polyclinique la Providence ryakoze umuganda wo gusana iteme rigana ku ivuriro bakoreramo, no gupima ku buntu indwara zitandura, ubundi zishyurirwaga amafaranga.

Umuyobozi Nshingwabikorwa wa Policlinic la Providence Muhire Claude, avuga ko nk’ivuriro bafite inshingano zo kwita ku baturage barituriye, barimo n’abakeneye gusuzumwa indwara batishoboye, ari yo mpamvu bahisemo kwifatanya n’Akarere ka Muhanga mu muganda batanga serivisi zo gusuzuma ku buntu.

Agira ati "Ni ngombwa ko nk’abatanga serivisi z’ubuvuzi, twita no kwigisha uko isuku ikorwa hirindwa indwara, twakoze isuku ahadukikije kugira ngo tunafashe abaturage duturanye, tunubahiriza gahunda y’Akarere yo gupima indwara zitandura. Ni yo mpamvu twapimye izi ndwara ku buntu, kandi umuturage abyisuzumishije yishyuye 100%, yatanga ari hejuru ya 10,000Frw.

Ubuyobozi bw’Akarere ka Muhanga bukomeje gusaba abaturage kwirinda kujugunya imyanda ku gasozi, no kwirinda gusohora amazi ajya hanze y’ibipangu, kugira ngo birinde ibihano bishamikiyeho.