No mu Ngabo z’u Rwanda haba uburinganire n’ubwuzuzanye

Yanditswe na

Ruzindana Janvier

9-06-2026 - 06:16' | Ibitekerezo ( )

Maj Gen Alexis Kagame, Umugaba Mukuru w’Inkeragutabara yashimye byimazeyo Perezida wa Repubulika y’u Rwanda akaba n’Umugaba w’Ikirenga w’Ingabo, Paul Kagame ku nkunga adahwema gutanga mu guteza imbere uburinganire n’ubwuzuzanye bw’abagabo n’abagore mu gisirikare.

Yabigarutseho kuri uyu wa Kabiri tariki 08 Kamena, mu gutangiza umwiherero w’Urwego rushinzwe uburinganire n’ubwuzuzanye bw’ abagore n’abagabo mu Ngabo z’Igihugu.

Batangije umwihererero w’iminsi itatu, ufite insanganyamatsiko igira iti: “Iyubahirizwa ry’ihame ry’uburinganire no guteza imbere ubwuzuzanye mu Ngabo z’u Rwanda.”

Uyu mwiherero uri kubera mu Ishuri Rikuru rya Gisirikare ry’u Rwanda i Gako mu Karere ka Bugesera, ukaba wahuje Ofisiye n’abandi basirikare (Abagore n’Abagabo) bo nzego zitandukanye hagamijwe gukomeza gushimangira ibikorwa biteza imbere uburinganire n’ubwuzuzanye muri RDF.

Maj Gen Alexis Kagame, yagaragaje ko uyu mwiherero w’iminsi itatu ugamije gufasha kurushaho guteza imbere politiki y’uburinganire no kongerera ubushobozi abagore bo mu Ngabo z’u Rwanda, bityo ukaba ugaragaza umuhate w’ubuyobozi bwa RDF mu kwimakaza indangagaciro z’iterambere rishingiye ku mikorere myiza n’imiyoborere ijyanye n’intego z’Igihugu ndetse n’inshingano mpuzamahanga ku bijyanye n’uburinganire.

Abitabiriye uyu mwiherero bazasuzumira hamwe ibyagezweho mu ishyirwa mu bikorwa rya politiki y’uburinganire n’iterambere ry’abagore, baganire ku ngamba zikomeye zo gukumira no kurwanya ihohoterwa rishingiye ku gitsina (GBV) mu Ngabo z’u Rwanda no mu miryango y’abasirikare, ndetse banasesengure ishyirwa mu bikorwa rya Politiki y’Uburinganire ya 2023.