Ni Umuganda wibanze cyane ku bikorwa by’isuku n’ubukangurambaga bwayo, ku ntero igira iti ‘Isuku Hose’, aho mu Karere ka Rulindo bawukoreye mu Kagari ka Kajevuba, Umurenge wa Ntarabana, bibanda cyane ku bikorwa byo gukora imihanda n’inzira zitwara amazi muri site nshya y’imiturire yo mu Kajevuba, ifatwa nk’imwe muri site nini muri ako Karere kuko iri ku buso bwa hegitari 252.

Ni igikorwa abahatuye n’abahaturiye bemeza ko kibaye intangiriro y’iterambere ry’iyo site, kubera ko kuba abayobozi bagiye kwifatanya na bo mu bikorwa byo kuhakora, bitanga icyizere cy’ahazaza habo.

Umwe mu bitabiriye uyu muganda yagize ati “Kubona abayobozi bo mu nzego zo hejuru, bamanuka bakaza kwifatanya n’abaturage hasi, mu rwego rw’ibikorwa by’iterambere, twagura imihanda, ni igikorwa gishimishije, kibanziriza ibikorwa turimo kwitegura, byo kuba twakatirwa amasite muri uyu Murenge wacu.”

Mugenzi we ati “Hazaba umujyi mwiza cyane, kubera ko jye nibuka igihe nageraga hano, hari mu giturage kiri inyuma cyane, ariko ndabona hagenda hazamuka. Uyu muhanda numara gukorwa, ndakubwira ko hazaba ari ahantu heza, hari umujyi mwiza, nta kibazo na kimwe.”

Hon. Kazarwa yababwiye ko bakwiye kujya bumva ibintu ubuyobozi bwiza bubaha, kubera ko iyo babyumvise biba ibyabo.

Yagize ati “Ni byiza cyane ko nabonye abantu benshi ari urubyiruko, mugire isuku, muyigirire barumuna banyu, muyitoza n’ababyeyi cyangwa muyibakorere, kubera ko mufite imbaraga, ni namwe mbaraga zacu dufite. Ni umurimo wacu wo kugira ngo dusukure hose, kandi mwabitangiye, mukomerezeho, isuku ihoraho ntabwo ijya irekera, buri muntu isuku imuhereho, ibintu byose bibe isuku.”

Abadepite bamaze icyumweru bazenguruka hirya no hino mu gihugu, aho bageze mu Mirenge 237, bumva ibyifuzo by’abaturage, banasura ibikorwa bitandukanye birimo ibigaragaza iterambere ry’imijyi, imiturire n’imikoreshereze y’ubutaka.

Ku rwego rw’Umujyi wa Kigali Umuganda rusange wakorewe mu Kagari ka Nyabugogo, abaturage bibutswa kurushaho kwigirira isuku no kuyigirira aho batuye.

Umuyobozi w’Umujyi wa Kigali, Samuel Dusengiyumva, yavuze ko uyu munsi wari umuganda wo kugira ngo bibukiranye kuri gahunda zitandukanye z’Umujyi wa Kigali, harimo no kurwanya ihohotera

Yagize ati “Ariko tugaruka ku isuku, tuvuga tuti, isuku ibe hose, yaba ku mubiri n’aho dukorera. Mwabonye abamotari harimo abo ubona bakeneye kunoza isuku yabo, ariko n’isuku y’ibiribwa, aho abantu batuye, isuku ahantu hose, ku buryo mu Mujyi wa Kigali ubona ko koko isuku dukomeza kuyigira umuco igafata”.

Yunzemo ati “Izi ngamba zishingiye ku bayobozi begera abaturage, mutwarasibo abyumvise akabigira ibye, umukuru w’umudugudu agahiga ko umudugudu we uba uwa mbere mu isuku byashoboka. Mwabonye ko ikibazo kiri mu ngo, aho umuntu acururiza, muri gare, ahantu hose hari ikibazo cy’umwanda hari abantu, ingamba ya mbere ni uko abayobozi babigira ibyabo n’abaturage bakabasha kubitwara byaturutse muri twe.”

Minisitiri w’Ubuzima Dr. Sabin Nsanzimana, wifatanyije n’abatuye mu Karere ka Nyamagabe mu muganda rusange usoza ukwezi, avuga ko isuku ari isoko y’ubuzima, ariko bikwiye gushyirwa mu bikorwa bikava mu magambo, kuko kutabikora bishobora kugira ingaruka ku buzima bwa muntu.

Ati “Imibare igaragaza ko indwara abantu barwara, hafi 80% bishobora kwirindwa, ndetse 40% by’indwara tuvura mu bitaro no mu mavuriro yacu, zituruka ku isuku nke, bivuga ko dushobora kugira icyo dukora izo ndwara ntizibeho. Ntabwo ari ibintu bigoye gukaraba intoki, koga ku mubiri, koza amenyo, umuntu ugiye kugenda agashaka inkweto agenda yambaye, kuko aho ukandagira ushobora kuhakura indwara.”

Arongera ati “Iyo bigeze aho abantu barunda imyanda bahurira ari benshi, ushobora gusanga havuyemo n’ibyorezo, kuko isuku nke iva ku myanda y’umuntu umwe, ariko ishobora kugera no ku bantu benshi. Izo ndwara tuzirinze, n’ayo mafaranga twashoraga mu buvuzi, n’abaturage bahoraga kwa muganga, bashobora kuzirinda mu ngo zabo tugakomeza iterambere.”

Minisiteri y’Ubuzima (MINISANTE), igaragaza ko abantu benshi bivuza indwara ziterwa n’isuku nke, ari abivuza indwara zo mu kanwa, aho basanze igituma ziyongera cyane, ari uko badasukura mu kanwa uko bikwiye kandi buri gihe, bikabaviramo uburwayi butandukanye bufata amenyo, bikarangira akuwemo cyangwa bagahendwa bayakoresha mu bundi buryo.

Mu ndwara nyinshi bagaragaza ko zishobora guterwa n’umwanda, harimo n’iza Kanseri, ari na yo mpamvu abantu bashishikarizwa kugira isuku, bikabafasha gusa neza no kwirinda izo ndwara.