Iyi gahunda ni umwe mu myanzuro y’Inama y’Abaminisitiri yo ku mugoroba wo kuri uyu wa Gatanu tariki 28 Ugushyingo 2025, ikazanagezwa no mu yindi Mijyi, ikazarangwa na serivisi yizewe, aho biteganyijwe ko bisi zizajya zubahiriza ingengabihe yagenwe.

Izanarangwa no gucunga uruja n’uruza mu buryo bugezweho, kuko hazashyirwaho uburyo bugezweho bwo gukurikirana imodoka ku gihe, bikazatuma zisaranganywa aho zikenewe, bityo abagenzi bakabona serivisi ihoraho kandi mu mihanda yose.

Ni gahunda kandi, izarangwa no kurengera ibidukikije, nk’uburyo buzafasha u Rwanda kugera ku ntego z’umujyi utangiza ibidukikije nkuko biteganyijwe muri gahunda y’Igihugu yo kwihutisha Iterambere (NST2), n’icyerekezo cya 2050.

Urwego Ngenzuramikorere (RURA), ruheruka gutangaza ko hari ikigo cya Leta, kitazangira imirimo yo gutwara abantu mu buryo bwa rusange hagamijwe kunoza uburyo byakorwagamo.

Byagarutsweho n’Umuyobozi Mukuru wa RURA, Evariste Rugigana, ku wa 8 Ukwakira 2025, ubwo yari mu Nteko Ishinga Amategeko Umutwe wa Sena.

Icyo gihe yavuze ko muri gahunda yo gukemura ikibazo cy’ubwiyongere bwa moto n’ibinyabiziga by’abantu ku giti cyabo, hashyizweho ikigo cya Leta cyitwa Ecofleet Solutions Ltd, kigamije gufasha mu kunoza ubwikorezi rusange.

Avuga ko hari ingamba zo kunoza ubwikorezi rusange bwa bisi, zigendera ku gihe, ku buryo abantu batatekereza gusa moto igihe bagiye ku kazi.

Yagize ati “Tugomba kurushaho kunoza umwuga w’ubwikorezi rusange kugira ngo tugabanye moto n’izindi modoka tugira umutekano mu muhanda.”