Kicukiro: Inyigisho ku kubaka umuryango utekanye zisize imiryango 11 isezeranye mu mategeko

16-03-2026 - 12:28' | Ibitekerezo ( )

Ubuyobozi bw’Umurenge wa Kicukiro mu Karere ka Kicukiro, ku bufatanye n’amatorero n’amadini akorera muri uwo Murenge, barishimira ko ubukangurambaga bw’ibyumweru bitatu bwakozwe muri uwo Murenge guhera hagati muri Gashyantare 2026 bwatanze umusaruro ufatika, harimo imiryango 11 yari isanzwe ibana, yemeye gusezerana imbere y’amategeko, kongeraho indi irindwi yasezeranye imbere y’Imana.

Abayobozi mu Karere, abo mu matorero n'amadini ndetse n'abashyingiranwe imbere y'amategeko barishimira ko iyi miryango igiye kurushaho kubana neza no gutera imbere

Umuyobozi w’Ihuriro ry’Amadini n’Amatorero (RIC) mu Murenge wa Kicukiro, Bishop Rose Karasanyi, ashima umusaruro wavuye mu bufatanye bafitaye n’Umurenge wa Kicukiro by’umwihariko muri ubwo bukangurambaga bwagenderaga ku nsanganyamatsiko igira iti “uruhare rwanjye mu kubaka umuryango utekanye kandi ushoboye” bukaba busize ingo 11 zabanaga zemeye gusezerana mu buryo bwemewe n’amategeko.

Ni nyuma y’uko iyo miryango yaganirijwe, irigishwa, isanga gukomeza kuba mu muryango abantu badashyingiwe mu buryo bwemewe n’amategeko, uretse no kuba batuzuza neza gahunda za Leta, bituma igenamigambi ritagenda neza, ariko n’umukirisitu mwiza akaba ari ukwiye kubana n’uwo bashyingiranywe bujuje ibisabwa byose.

Bishop Rose Karasanyi yagize ati “Twebwe nk’abashingiye ku madini n’amatorero, twemera ko Imana ubwayo yaremye umuntu ndetse imuremera umufasha umukwiriye. Rero iyo umuntu akwiriye undi baba bagomba gutekana, bakabana mu mahoro, kandi bakaba umuntu umwe, muri Leta y’ubumwe. Murumva ko ari ibintu byiza kandi Imana irabishyigikiye cyane.”

Ubufatanye bwa RIC n’Umurenge wa Kicukiro bwatangiye muri 2023 bakora ibikorwa birimo kwishyurira abatishoboye umusanzu w’ubwisungane mu kwivuza, amahugurwa y’isanamitima agamije kurwanya amakimbirane mu miryango, Igiterane cy’ubumwe bw’Abakirisitu, kumenyekanisha ibikorwa by’ubumwe n’ubudaheranwa, kubakira abatishoboye barimo abimuwe mu manegeka, hagamijwe kuzamura imibereho myiza y’abaturage, gusana amacumbi y’abarokotse Jenoside yakorewe Abatutsi, hagamijwe kuzamura imibereho myiza, gufasha abana baturuka mu miryango itishoboye, bahabwa ibikoresho by’ishuri, n’ibindi.

Bafatanyije kandi mu bukangurambaga mu matora y’Abadepite n’ay’Umukuru w’Igihugu muri 2024, hagamijwe kwimakaza ihame rya Demokarasi n’imiyoborere myiza bagizemo uruhare nk’abaturage.

Bishop Karasanyi ati “Twageze no kuri iki gikorwa cyo kugira ngo buri wese amenye uruhare rwe mu kubaka umuryango utekanye kandi ushoboye. Umusaruro wacyo mwiza ni iki gikorwa cyo gusezeranya imiryango. Turizera ko Imana izayishoboza gukomeza gutekana nk’uko bitugaragarira, kandi bagakora cyane, bakiteza imbere.”

Ubukangurambaga ku kubaka umuryango utekanye kandi ushoboye, bwasojwe baremera imiryango itanu, ihabwa ubushobozi bwo kuyifasha kwikura mu bukene, kugeza ubwo na yo izagira uruhare rwo gufasha abandi.

Umushumba Mukuru w’Itorero rya ADEPR mu Rwanda akaba n’Umuvugizi waryo, Pasiteri Ndayizeye Isaïe, na we witabiriye ibirori byo gusoza ubwo bukangurambaga, yagize ati “Twishimira ubufatanye tugirana nk’amadini n’amatorero ndetse n’ubwo tugirana n’ubuyobozi bw’inzego z’ibanze, mu rugendo rwo kubaka umuryango. Umuryango watangijwe n’Imana, kandi ibyiza byose Imana yabishyize mu muryango. Ni yo mpamvu umuryango uramutse utitaweho, ntugire agaciro, utanezerewe, ndetse usenyuka, ntiwaba wubaka n’Igihugu ndetse n’itorero. Ndashimira mwebwe mwamaze gusezerana, ariko n’abandi twese tuva mu miryango. Rero ndasaba buri wese gukomeza kugira uruhare kugira ngo umuryango we ube mwiza. Gusenya si ubutwari, ni ubugwari.”

Pasiteri Ndayizeye Isaïe yifurije abagize imiryango yasezeranye kubahana no kwizerana kuko bizafasha ingo zabo gukomera

Umuyobozi Nshingwabikorwa w’Akarere ka Kicukiro, Mutsinzi Antoine, na we yashimye ubufatanye bw’Umurenge wa Kicukiro n’ihuriro ry’amadini n’amatorero (RIC). Ati “Uru ni urugero rwiza kuko ntabwo turabasha kubibona mu Mirenge yose uko ari icumi, ariko inshingano dufite ni uko ibyiza twabonye tutemera ko biguma hamwe, ahubwo tuzabikomeza n’ahandi kugira ngo birusheho gutanga umusaruro.”

Jeanne d’Arc Uwimana uhagarariye Inama y’Igihugu y’Abagore (CNF) mu Murenge wa Kicukiro, ashima umusaruro wagezweho uturutse ku bufatanye bw’amatorero n’amadini, ubuyobozi bw’inzego z’ibanze ndetse n’abaturage.

Yagize ati “Umurenge wacu wa Kicukiro wiyemeje kubaka ingo uhereye ku matorero. Twahereye ku giterane cyahuje amadini n’amatorero ndetse hari n’amakorali menshi atandukanye yifashishijwe mu gutanga inyigisho zo kubaka umuryango utekanye kandi uhamye. Twaganirije ingo, abakobwa babyariye iwabo, ababyeyi bibana, abagabo badafite abagore n’abagore badafite abagabo. Uyu munsi turishimye cyane kuko imbuto twabibye zatanze umusaruro. Bya biganiro twatanze mu babanye batarasezeranye mu buryo bwemewe n’amategeko byagize umusaruro w’iyi miryango 11 yemeye gushyingiranwa.”

Mutsinzi Antoine uyobora Akarere ka Kicukiro yashimye ibyagezweho biturutse ku mikoranire y'Umurenge wa Kicukiro n'ihuriro ry'amadini n'amatorero (RIC), avuga ko iyi gahunda ikwiye kugezwa no mu yindi mirenge

Mu basezeranye harimo umuryango wa Nzabakirana Edouard na Mbategamaso Dorothée. Mu kugaragaza imbamutima zabo, Nzabakirana yagize ati “Ni iby’ingenzi kuri uyu munsi, kuko nkanjye maze imyaka 15 mbana n’umugore tutarasezeranye. Tubyaranye kane, abana bari ab’umugore none babaye abacu twembi. Ubu tugiye kubana mu buryo bwemewe n’amategeko.” Mbategamaso na we yagize ati “Bimpaye agaciro gakomeye kuko ubu biratuma turushaho kwizerana. Ndashimira Imana ibidushoboje nyuma y’imyaka 15 yose.”