Yabitangaje kuri uyu wa kane tariki 14 Gicurasi 2026 mu nama Mpuzamahanga y’Abayobozi Bakuru b’Ibigo izwi nka ‘Africa CEO Forum’, iri kubera i Kigali.

Abitabiriye iyi nama baganiriye ku mpamvu abatuye Umugabane wa Afurika bakwiye gufatanya mu kwigira no kwishakamo ibisubizo biganisha ku iterambere.

Umuyobozi w’Ikigega cy’Imari cya Banki y’Isi gifasha abikorera (International Finance Corporation), Makhtar Diop, yavuze ko inzego zirimo ubuhinzi zitejwe imbere zafasha Afurika mu guhanga imirimo, kwihaza mu biribwa no guteza imbere inganda.

Ati “Intego ni ukubona amafaranga ajya mu baturage ndetse n’imirimo ihangwa ari myinshi.”

Makhtar Diop yavuze ko kwihuriza hamwe kw’Abanyafurika havanwaho imipaka mu bijyanye n’ubucuruzi n’ishoramari, ari bimwe mu byafasha abatuye uyu Mugabane kugera ku iterambere bifuza.

Makhtar Diop, yavuze ko Umugabane wa Afurika ufite abaturage benshi kandi bafite impano n’ubushobozi bwo gukora byose bikenewe mu kugera ku mpinduka zifuzwa.

Yerekanye ko urwego rw’ingufu n’ibikorwa remezo ari zimwe mu zafasha kugera ku iterambere.

Ati “Ingufu n’ibikorwaremezo, nta ruganda rwakora rudakeneye ingufu ni yo mpamvu twiyemeje kugeza amashanyarazi ku baturage miliyoni 300 ba Afurika kandi urwego rw’abikorera ni rwo ruzabigiramo uruhare.”

Umuyobozi Mukuru w’Urwego rw’Igihugu rushinzwe Iterambere, RDB, Jean-Guy Afrika, yavuze ko iterambere Afurika yifuza ritagerwaho na za Guverinoma gusa cyangwa abikorera bakora basa nk’abitaruye.

Ati “Ariko hamwe no gusangira inshingano, gusangira kwiyemeza no gushyira mu bikorwa, ubu butumwa ni ingenzi uyu munsi. Ubukungu bw’Isi buri guhinduka vuba, igishoro kiri kugera kuri bamwe, gutera inkunga imishinga birahenze kandi ikoranabuhanga riri guhindura buri rwego.”

Umuyobozi Mukuru wa RDB, Jean Guy Afrika, yavuze ko u Rwanda rwamaze kumenya ko iterambere ritagerwaho n’Igihugu kimwe ari na yo mpamvu rwashoye imari mu kubaka ibikorwaremezo, ubukerarugendo, urwego rwo gutwara abantu n’ibintu mu kirere ndetse n’ikoranabuhanga.

Ni ibintu yavuze ko bifasha abashoramari gushora mu Rwanda, bagakora neza kandi bakunguka bakorera imbere mu gihugu ariko babasha no kugera ku isoko ryo hanze y’u Rwanda.

Ati “Urugendo rwacu rw’iterambere rwahoze rudusaba gutekereza birenze uko igihugu kingana mu buso, ahubwo rwubakiye ku gufungura amarembo no kwihuza n’abadufasha guha serivisi atari isoko ry’Abanyarwanda gusa ahubwo no mu Karere kose ndetse n’Umugabane.”