Iki gikorwa cyabaye mu gihe cyo Kwibuka ku nshuro ya 32 Jenoside yakorewe Abatutsi, by’umwihariko hibukwa abahoze ari abakozi bane b’Inama y"igihugu iharanira amajyambere - Conseil National de Développement (CND) bazize Jenoside yakorewe Abatutsi.

Abakozi bibutswe ku nshuro ya 32 ni ni Gashayija Pierre Célestin, Kayiranga Célestin, Mugenzi Jean Louis na Mukantembe Aloysie.

Uru rwibutso rugizwe n’ibice bine birimo Urukuta rw’Ubutumwa, Inkingi enye z’Urwibutso, Ubusitani bw’Urwibutso n’Urumuri rw’Icyizere.

Senateri Jean Pierre Dusingizemungu yasobanuye ko buri gice muri ibi gifite ubutumwa bwihariye.

Yavuze ko Urukuta rw’Ubutumwa ruhamagarira abarusura gushyira imbaraga mu gukumira Jenoside, kurwanya ingengabitekerezo ya Jenoside, no kurwanya ukuyihakana no kuyipfobya, ndetse no kurandura ivangura n’amacakubiri mu buryo bwose. Yanavuze ko runashishikariza Abanyarwanda kwimakaza ubumwe n’ubudaheranwa nk’ishingiro ry’ejo hazaza.

Ati: "Igice cya kabiri kigizwe n’inkingi enye n’ibimenyetso byo kwibukiraho abakozi ba CND bazize Jenoside yakorewe Abatutsi uko ari bane. Izo nkingi zigizwe n’amabuye yatoranyijwe kubera imiterere yayo karemano n’uburemere bwayo. Ayo mabuye asobanura ’Guhoraho’."

Senateri Dusingizemungu yavuze ko gukoresha amabuye manini karemano bishimangira ko urwibutso rw’abibukwa rushinze imizi kandi ruzahoraho.

Yasobanuye kandi ko uburebure bw’izo nkingi, buruta ubw’umuntu, bugamije gutuma uzireba azegera urwibutso yubashye abishwe muri Jenoside, mu gihe uburemere bw’amabuye bugaragaza uburemere bw’amateka ya Jenoside yakorewe Abatutsi.

Ku bijyanye n’Ubusitani bw’Urwibutso, Senateri Dusingizemungu yavuze ko ari ahantu hagenewe gutuza, kwibuka no gutekereza. Yavuze ko bugizwe ahanini n’ibimera bya cactus, byatoranyijwe kubera ubushobozi bwabyo bwo gukura no kubaho neza no mu bihe bikomeye, bikaba bigereranywa n’ukwihangana, kwigirira icyizere no gukomera k’umutima wa muntu mu bihe by’ingorane.

Ati: "Igice cya kane kigizwe n’Urumuri rw’Icyizere, rukaba ari ikimenyetso cyerekana kudaheranwa n’amateka ya Jenoside yakorewe Abatutsi, ukwihangana n’icyizere cyo gukomeza kubaka igihugu kirangwa n’Ubumwe, Ubudaheranwa n’Iterambere."