Aba bahoze ari abasirikare muri FDLR, n’abaherutse kwitandukanya n’uwo mutwe mu minsi ishize, bari mu kigo cya Mutobo giherereye mu Karere ka Musanze, aho banyura bakamara igihe cy’amezi atatu bigishwa amasomo atandukanye arimo imyuga n’andi abategurira gusubira mu buzima busanzwe, kugira ngo bizabafashe kuba abaturage b’intangarugero.

Urugendo abo bajyanama mu bya gisirikare bakoze, ni ukugira ngo babone gihamya yemeza koko ko uwo mutwe wiganjemo abasize bahekuye u Rwanda, uhari kandi ko ukomeje ibikorwa by’ubugizi bwa nabi hamwe n’umugambi wo guhirika ubutegetsi bw’u Rwanda, kuko hari imiryango mpuzamahanga myinshi ndetse n’ibihugu bitemera ko uhari.

Bamwe mu bahoze muri FDLR, bemeza ko kuba uwo mutwe ukiriho ari uko ushyigikiwe na Leta ya Repubulika Iharanira Demokarasi ya Congo (RDC), kubera bafatanya mu bucuruzi yaba ubusanzwe cyangwa se ubujyanye n’amabuye y’agaciro, ari nabyo bituma bashobora kugura no kubona intwaro bakoresha mu bikorwa byabo by’ubugizi bwa nabi.

Lt. Col. Emelien Mpakaniye, wahoze ari umwe mu barinda abayobozi bakuru muri uwo mutwe, avuga ko hagati ya 2008 na 2010, yakoraga mu rwego rushinzwe ubushakashatsi mu bijyanye n’amabuye y’agaciro.

Ati “Ubwo bushakashatsi ni ubujyanye no gushaka ahantu haherereye amabuye y’agaciro, noneho babe bashakisha isoko kugira ngo babashe kugurisha. Muri ibyo byo gucuruza aho bacukura amabuye y’agaciro, ahanini nibo boherezamo abantu bagacuruza, amafaranga avuyemo agura intwaro. Ikindi nanone kubona intwaro, ni uko Guverinoma ya RDC ubwayo, iyo irabiyegereza, bakabaha ibikoresho bakababwira ko nabo bazabafasha gusubira mu gihugu cyabo.”

Umwe mubaheruka gutaha yagize ati “Muri RDC twari tubayeho mu buzima butari bwiza, ubuzima bw’intambara, ubuzima bwo guhangana umunsi ku wundi, ariko ubu twaratashye mu Rwanda tubayeho neza, uburenganzira bwa muntu burubahirizwa, dufite uburenganzira bwo gukora icyo dushaka cyaduteza imbere, ni byiza ko n’abari batarataha, baza mu Rwanda, bakava mu buzima barimo bakaza mu buzima bushya hano mu Rwanda.”

Abajyanama mu byagisirikare muri za Ambasade, babajije ubuyobozi bwa Komisiyo y’igihugu ishinzwe gusezerera no gusubiza mu buzima busanzwe abari abasirikare (RDRC), ibibazo birimo kuba bafite uburyo bakurikiranamo abitandukanyije na FDLR, bataha ko badasubirayo, basubizwa ko nubwo bimaze kuba ku muntu umwe gusa ariko igihe byakorwa bishobora kumenyekana, ku buryo ntawe ushobora gusubirayo ngo yongere ataha ntamenyekane.

Umuyobozi Mukuru wa RDRC, Valérie Nyirahabineza, avuga ko kimwe mu byari bigamijwe ari ukwereka abajyanama mu bya gisirikare muri za Ambasade, ari uko FDLR koko ihari.

Ati “Bari baje gufata amakuru y’impamo, atari ya yandi babwirwa n’abantu banyuranye cyangwa basoma mu bitangazamakuru binyuranye. Ni icyo ngicyo cyari cyabazanye, kuko tuba twifuza ko ijwi ryabo rigera kure, babwira iwabo ko ikibazo duhora tuvuga cya FDLR, ko gihari.”

Yunzemo ati “Twaberetse ko dufite abantu baturutse muri RDC, mu mashyamba, ndetse twanabasangije y’uko n’ubu hari abandi 25 tugiye kwakira , baturutse mu Majyepfo y’Iburengerazuba, banyuza za Uvira barimo kuza.”

Abarwanyi b’Abanyarwanda bashaka gutaha, bishyikiriza ubuyobozi bw’ubutumwa bw’amahoro bw’Umuryango w’Abibumbye muri RDC (MONUSCO), na bwo bukabashyikiriza u Rwanda.

Kugeza ubu mu kigo cya Mutobo harabarirwa abarenga 362 biganjemo abaheruka gutaha mu minsi ya vuba, bashobora kwiyongera kuko ngo abenshi bamaze kumenya ukuri bakaba barimo gutaha ku bwinshi.

Kuva mu mwaka wa 2001 hamaze gusezererwa no gusubiza mu buzima busanzwe abari abasirikare bahoze mu mitwe yitwaje intwaro barenga ibihumbi 12.

Reba ibindi muri iyi video: