Mu itangazo ryagenewe abagenzi, RwandAir yatangaje ko izo mvururu zatewe n’amakimbirane hagati y’abakozi n’ubuyobozi bw’ikibuga cy’indege, ibintu byatumye ibikorwa byinshi bihagarara cyangwa bidindira. Ibi byagize ingaruka ku ngendo zimwe z’iyi sosiyete, zitinda cyangwa zigahagarikwa burundu.

Indege ya WB453 yaratinze, ishyirirwaho isaha nshya yo guhaguruka saa 20:50 ku isaha yo mu karere. Indi ndege, WB402, yagombaga kuguruka ku wa 16 Gashyantare, yo yahagaritswe. Abari barateganyijwe ku ndege ya WB403 bo bashyizwe ku rutonde rw’abagenda na WB453, mu rwego rwo kugabanya ibibazo byatewe n’iri hungabana.

Ku bagenzi, ibi byateje gutegereza igihe kirekire ku kibuga cy’indege, gusubikwa kw’ingendo, ndetse no kubura indi ndege ku bari bafite izindi bahuriraho banyuze i Nairobi. JKIA ni kimwe mu bibuga by’ingenzi mu karere ka Afurika y’Iburasirazuba, ku buryo ihungabana ribayeho rigira ingaruka ku masosiyete menshi y’indege no ku ngendo zo mu bihugu bitandukanye.

RwandAir yatangaje ko iri gukurikiranira hafi uko ikibazo gihagaze, kandi iri gukora ibishoboka byose ngo igabanye ingaruka ku bagenzi. Abakeneye ubufasha basabwe kwegera ibiro byayo bibegereye kugira ngo bafashwe gusubika cyangwa guhindura ingendo zabo.

Nubwo ibibazo nk’ibi biba biturutse ku mikorere y’ikibuga cy’indege atari amakosa y’isosiyete y’indege, ingaruka zabyo zigaragarira cyane ku bagenzi, baba bagomba guhindura gahunda zabo z’akazi cyangwa izindi mpamvu z’urugendo. Kugeza ubu, ntiharamenyekana igihe imikorere isanzwe izasubirira ku kibuga cya JKIA.