Iwao Hakamada yagizwe umwere amaze imyaka 50 ategereje igihano cy’urupfu

Iwao Hakamada, yari yarakatiwe urwo gupfa, nyuma y’uko mu 1968 ahamijwe icyaha cyo kwica uwari shebuja, umugore wa shebuja n’abana babo babiri.

Umwaka ushize nibwo urubanza rwe rwongeye gusubirwamo nyuma yo gukeka ko abakoze iperereze bateguye kandi bakazana ibimenyetso byashingiweho n’urukiko rukamuhamya kwica abantu bane.

Uyu mugabo nyuma yo kumara iyo myaka yose afunze buri munsi ategereje kwicwa, BBC yatangaje ko ngo byagize ingaruka ku buzima bwo mu mutwe, byatumye atabasha kwitabira urubanza rwe rwabaye kuri uyu wa Kane agirwa umwere.

Hakamada wahoze ari umukinnyi w’umukino w’iteramakofe wabigize umwuga, urubanza rwe ni rumwe mu manza ndende kandi zavuzwe cyane mu Buyapani, byatumye abantu benshi bashaka kumenya ibyarwo, ndetse kuri uyu wa Kane abantu 500 bari bateraniye mu rukiko rw’i Shuzuoka, bategereje kumva umwanzuro.

Uyu muryango w’abantu bane ashinja kwica barimo shebuja, umugore we n’abana babo babiri, ngo imirambo yabo bayisanze yahiriye mu rugo rwabo i Tokyo. Uko ari bane ngo bari batewe ibyuma mbere yo gutwika urugo rwabo.

Hakamada yashinjwe ubu bwicanyi, bitewe n’uko mu 1966 yakoreraga shebuja mu ruganda rukora ibiribwa bishongesheje byitwa miso, bikavugwa ko ariwe warimbuye uyu muryango, agatwika inzu yabo kandi akabiba Amayen ibihumbi 200 (Amafaranga akoreshwa mu Buyapani). Mu 1968 nibwo yahamijwe ubwicanyi no gutwika, akatirwa urwo gupfa.

MENYA UMWANDITSI

Ruzindana Janvier

Umunyamakuru

@RuzindanaJunior

Reba inkuru zose nanditse ( 1338 )