Minisiteri y’Ubuzima y’u Bufaransa yavuze ko uwo muganga yahise ajyanwa mu kigo cyihariye kivura indwara zandura zikomeye, kandi ko ubuzima bwe buhagaze neza.

Mu kwezi gushize, RDC yatangaje ko yongeye kwibasirwa na Ebola, nubwo abahanga bavuga ko iyi ndwara ishobora kuba yari imaze ibyumweru byinshi ikwirakwira mbere y’uko imenyekana.

Kugeza ubu, abantu barenga 260 bamaze guhitanwa na yo, mu gihe abarenga 1,000 bamaze kuyandura.

Uyu ni wole murwayi wa mbere wa Ebola wemejwe ku mugabane w’u Burayi muri iki cyorezo, nubwo hari umuganga w’Umunyamerika wari waranduye muri RDC akaba yaravuriwe mu Budage mu kwezi gushize.

Uganda na yo yamaze kwemeza ko hari abantu banduye Ebola ku butaka bwayo.

Ishami ry’Umuryango w’Abibumbye ryita ku Buzima (OMS/WHO) rivuga ko abantu 20 bamaze kwandura iyo ndwara muri Uganda, mu gihe babiri bamaze gupfa.

Minisiteri y’Ubuzima y’u Bufaransa yavuze ko ibyago byo kwanduzanya mu baturage bisanzwe biri hasi cyane, ariko ko hatangiye igikorwa cyo gushakisha abantu bose bashobora kuba barahuye n’uwo muganga.

Abakozi bo mu rwego rw’ubuzima ni bamwe mu bafite ibyago byinshi byo kwandura Ebola kuko ikwirakwizwa n’amazi n’uturandaryi two mu mubiri w’umuntu wanduye.

Iki cyorezo kiri guterwa n’ubwoko bwa virusi bwa Bundibugyo, kandi kugeza ubu nta rukingo rwemewe ruburinda.

U Bufaransa bwatangaje ko bwashyizeho uburyo bwihariye bwo gukurikirana abakozi b’imiryango y’ubutabazi baturuka muri RDC.

Afurika CDC n’inzego z’ubuzima za Leta Zunze Ubumwe za Amerika ziburira ko iki cyorezo gishobora kuba kimwe mu bikomeye byigeze bibaho.

Muri RDC, ubwandu bwinshi buri mu ntara za Ituri, Kivu y’Amajyaruguru na Kivu y’Amajyepfo.

Intara ya Ituri ni yo ifite umubare munini w’abanduye, kuko irimo abarenga 90% by’abamaze kwemezwa ko bafite Ebola.

OMS ivuga ko umutekano muke n’intambara mu burasirazuba bwa RDC bikomeje kugora ibikorwa byo kurwanya iki cyorezo.