Umurambo w’Igikomangoma Philip watwawe mu modoka yo mu bwoko bwa ‘Land Rover’ ifunguye inyuma ari na ho isanduku yari iri nk’uko yari yarabiteguye mbere y’uko yitaba Imana, cyane ko iyo modoka ari we ubwe wayihinduye kugira ngo izabashe gutwara umurambo we.

Umwamikazi we yari mu yindi modoka mu gihe abandi bose bitabiriye uwo muhango, dore ko bari na bake cyane kubera kwirinda Covid-19, bagendaga n’amaguru baherekeje ya modoka itwaye umurambo, bakaba bari biganjemo abo mu muryango w’Ubwami.

Gusezera ku murambo byabereye muri Kiliziya ya St George’s Chapel iherereye muri paruwasi ya Windsor, iri ku butaka bw’Ubwami ari na ho Igikomangoma Philip yashyinguwe ndetse akaba ari na ho Umwamikazi Elizabeth II na we azashyingurwa, nk’uko byatangajwe n’ikinyamakuru Le Point.

Mbere yo kumushyingura habayeho umunota wo guceceka, ukaba wabanjirijwe ndetse unasozwa no kurasa imizinga mu rwego rwo kumuha icyubahiro, cyane ko na we yabaye umusirikare.