RDC: Imfungwa 129 zapfuye zishaka gutoroka gereza

Yanditswe na

Ernestine Musanabera

3-09-2024 - 13:04' | Ibitekerezo ( )

Minisitiri w’Intebe akaba na Minisitiri w’umutekano imbere mu gihugu muri Repubulika ya Demukarasi ya Congo, yatangaje ko imfungwa 129 zari zifungiye muri gereza ya Makala mu mujyi wa Kinshasa zapfuye nyuma yo gushaka gutoroka gereza.

Imfungwa 129 zapfuye zishaka gutoroka gereza ya Makala mu Mujyi wa Kinshasa

Minisitiri Jacquemain Shabani, avuga ko aya makuru yatanzwe muri raporo y’inama y’umutekano yahuje abayobozi b’Ingabo n’inzego z’umutekano bayobowe na Minisitiri w’ubutegetsi bw’Igihugu tariki ya 2 Nzeri 2024.

Minisitiri Shabani avuga ko uyu mubare w’abantu 129 wapfuye ari uwa agateganyo, muri bo 24 bishwe n’amasasu ubwo inzego z’umutekano zageragezaga kuburizamo no gukumira iki gikorwa cyo gutoroka, abandi 105 bahitanywe n’umuvundo no kubura umwuka kuko abapolisi bagerageje guhosha iki gikorwa bakoresheje imbunda.

Minisitiri Jacquemain Shabani avuga ko abandi 59 bakomeretse barimo bitabwaho n’ubuyobozi bahabwa ubuvuzi.

Minisitiri Shabani yavuze ko ahagana saa munani z’ijoro zo ku wa Mbere imfungwa zo muri iyo gereza zatwitse inzu y’ubuyobozi ahabikwa amadosiye, ububiko bw’ibiribwa, n’aho bavurirwa.

Umwe mu bakozi ba gereza yabwiye ibiro ntaramakuru by’Abongereza, Reuters ko nta mfungwa yabashije gutoroka muri icyo gikorwa.

Minisitiri w’ubutegetsi bw’Igihugu yongeyeho ko hari Komisiyo yashyizweho mu gukora iperereza kuri iki kibazo.

Nyuma y’uku gushaka gutoroka, Minisitiri w’Ubutegetsi bw’igihugu yatangaje ko hagarutse ituze kandi ko iperereza rigikomeje.

Gereza ya Makala ifite ubushobozi bwo kwakira imfungwa 1,500 ariko irimo abagera ku 12,000 biganjemo abategereje kuburanishwa, nk’uko bivugwa na Amnesty International muri raporo yayo iheruka gusohora kuri Repubulika Iharanira Demokarasi ya Congo.