KT TV
RDC: Abaturage 20 baguye mu gitero ADF yagabye mu Ntara ya Ituri
Abaturage 20 bo mu Ntara ya Ituri mu Burasirazuba bwa Repubulika ya Demokarasi ya Congo, baguye mu gitero cyagabwe n’abakekwa kuba inyeshyamba zo mu mutwe w’iterabwoba wa ADF, urwanya ubutegetsi muri Uganda.
Aya makuru yemejwe n’inzego zibanze nk’uko byatangajwe n’ibiro ntaramakuru by’Abafransa AFP. Umuyobozi wa polisi muri ako gace yabwiye AFP ko abo bishwe bari babanje gutwarwa bunyago mu gitero ADF yagabye ahitwa Babila Babombi ku wa kabiri.
Uyu muyobozi yatangaje ko abishwe n’uyu mutwe harimo abagabo 16 n’abagore bane. Yavuze kandi ko abandi bantu bane babashije gutoroka abo barwanyi ubu bakaba barimo kwitabwaho n’abaganga mu bitaro kuko bari batemaguwe.
ADF irwanya ubutegetsi muri Uganda imaze imyaka hafi 30 yarashinze ibirindiro byayo mu burasirazuba bwa Congo ndetse mu 2019 uyu mutwe watangaje ku mugaragaro ko ukorana na Leta ya Kiyisilamu. Ushinjwa kandi gukora ibikorwa by’ubwicanyi muri Congo no muri Uganda.
Hashize hafi imyaka itatu ingabo z’Igihugu cya Uganda zifatanije n’iza Repubulika ya Demokarasi ya Congo, zitangije ibikorwa bya gisirikare bihuriweho bigamije kurwanya no gusenya umutwe wa ADF.
Ibitekerezo
Ohereza igitekerezo
|
|
