RDC: Abantu 50 basabiwe igihano cy’urupfu bashinjwa kugerageza guhirika ubutegetsi

Yanditswe na

Mediatrice Uwingabire

28-08-2024 - 10:55' | Ibitekerezo ( )

Muri Repubulika ya Demokarasi ya Congo, abantu 50 muri 51 bashinjwa kugira uruhare mu kugerageza guhirika ubutegetsi ku itariki 19 Gicurasi 2024, basabiwe n’ubushinjacyaha bwa gisirikare igihano cyo kwicwa bitewe n’uburemere bw’ibyaha bashinjwa.

abantu 50 muri 51 bashinjwa kugerageza gukora Coup d'Etat muri RDC basabiwe n'ubushinjacyaha bwa gisirikare igihano cyo kwicwa

Lt.Col Innocent Radjabu, uhagarariye Leta ya RDC muri urwo rubanza, yasabye abacamanza gukatira igihano cy’urupfu abaregwa bose kubera ibyaha bashinjwa birimo iterabwoba, gutunga intwaro bitemewe n’amategeko, kwica, kugira umugambi wo kwica, gutera inkunga iterabwoba n’ibindi.

Icyo gihano kigahabwa abaregwa 50 muri 51 havuyemo uwitwa Alain Tikimo, kubera ko we byagaragajwe afite ibibazo by’ubuzima bwo mu mutwe ‘troubles psychologiques’ nk’uko byasobanuwe mu nkuru y’ikinyamakuru Jeune Afrique.

Ku itariki 19 Gicurasi 2024, nibwo muri RDC habaye icyo igitero igisirikare cyise ‘igerageza rya Coup d’Etat’, ubwo abantu benshi bitwaje intwaro binjiraga mu rugo rwa Vital Kamerhe ubu uyoboye inteko ishinga amategeko ya RDC, ndetse no ku biro bya Perezida Félix Tshisekedi.

Uwo mugambi wahise uburizwamo n’inzego z’umutekano zahise zita muri yombi bamwe muri abo bagabye icyo gitero, abandi bane bahita bicwa harimo na Christian Malanga (wari ufite imyaka 41), Umunye-Congo wari utuye muri Amerika bikaba bivugwa ko ari we wari uyoboye icyo gitero.

Muri abo 51 baregwa kugerageza gukora Coup d’Etat barimo Abanye-Congo, Abanyamerika batatu, Umwongereza umwe, Umunya-Canada umwe n’Umubiligi umwe, ariko bose bafite inkomoko muri RDC.

Umwe mu baregwa wagarutsweho mu iburanishwa ryo ku wa kabiri tariki 27 Kanama 2024, ni Jean-Jacques Wondo, wari umukozi w’urwego rw’ubutasi rwa RDC, ubushinjacyaha buvuga ko ari we wari inyuma y’icyo gitero kandi ari na we watanze imodoka zitwara abakigabye.

Gusa, Wondo ahakana ibyo birego, ariko we kimwe n’abandi bareganwa, yasabiwe igihano cyo kwicwa.

Mu cyumweru gishize, nk’uko byatangajwe na BBC, nibwo abunganira Leta muri urwo rubanza basabye indishyi ya miliyoni 250 z’Amadolari, yo gusana ibyangijwe n’igitero cy’aba bantu.

Abo mu muryango w’umusivili witwaga Kevin Tamba bivugwa ko yiciwe muri icyo gitero kimusanze mu muhanda, basabye indishyi z’akababaro za miliyoni eshanu z’Amadorari ya Amerika, naho umupfakazi we asaba indishyi za miliyoni 20 z’Amadolari ya Amerika amugenewe n’abana babo barimo n’utaravuka ukiri mu nda kuko nyakwigendera yamusigiye inda.

Uruhande rw’abaregwa rwanenze igihano cy’urupfu basabiwe, ruvuga ko kirengereye bikabije. Biteganyijwe ko uruhande rw’abaregwa ruzumvwa mu iburanishwa ryo ku wa gatanu tariki 30 Kanama 2024.