Perezida Ramaphosa, ubundi ngo wamaze guhabwa inkingo zose za Covid-19, yatangiye kwiyumva nabi ku Cyumweru tariki 12 Ukuboza 2021. Uwo muyobozi ufite imyaka 69, ubu ari mu kato, akaba arimo kwitabwaho n’ibitaro bya gisirikare by’aho muri Afurika y’Epfo (South African Military Health Service).

Ubu inshingano ze zose nka Perezida, ngo zirimo gukorwa na Visi Perezida we, David Mabuza, akaba agomba kuzikora muri iki cyumweru cyatangiye uyu munsi. Perezidansi ya Afurika y’Epfo ntiyigeze itangaza niba Perezida Ramaphosa yanduye Virusi nshya ya Coronavirus yiswe ‘Omicron’.

Perezidansi ya Afurika y’Epfo yatangaje ko Perezida Ramaphosa n’itsinda bari kumwe bapimwe Covid-19 inshuro nyinshi mu gihe bari mu ruzinduko mu bihugu bine (4) byo muri Afurika y’Iburengerazuba mu cyumweru gishize.

Bamwe mu bari kumwe na Perezida Ramaphosa muri urwo ruzinduko, bagaragaye ko banduye Covid-19, bahita bagaruka muri Afurika y’Epfo byihuse, mu gihe Perezida Ramaphosa n’abandi bagize itsinda bari kumwe bo byagaragaraga ko ntayo bafite.

Itangazo ryasohowe na Perezidansi y’Afurika y’Epfo rigira riti “Perezida n’itsinda bari kumwe, bagarutse mu gihugu ku wa Gatatu tariki 8 Ukuboza 2021, baturutse muri Senegal nyuma y’uko ibisubizo bigaragaje ko nta Covid-19 bafite. Byanagaragaye ko Perezida Ramaphosa adafite Covid-19, n’igihe yari ageze i Johannesburg ku itariki 8 Ukuboza 2021”.

Muri iryo tangazo bavuze ko kurwara kwa Perezida Ramaphosa, bikwiye gufatwa nk’ibije kuburira abaturage bose ba Afurika y’Epfo ku kamaro ko kwikingiza, no gukomeza kwirinda icyorezo cya Covid-19.

Muri iryo tangazo bagira bati “Gukingira ni bwo buryo bwonyine busigaye bwo kurinda abantu kurwara icyo cyorezo no kuremba, bikababirinda no kuba bajya mu bitaro. Abantu bafite aho bahuriye na Perezida uyu munsi, twabagira inama yo gukomeza kwikurikirana bakareba ko hari ibimenyetso babona, cyangwa se bakipimisha”.

Muri iki gihe, Afurika y’Epfo ihanganye na virusi ya Coronavirusi yihinduranyije ya Omicron nk’uko bitangazwa n’abayobozi bo mu nzego z’ubuzima muri icyo gihugu.

Mu ntangiriro z’ukwezi k’Ugushyingo 2021, Afurika y’Epfo yari ifite hafi abantu 200 banduye Covid-19, ariko nyuma y’aho gato, ngo imibare izamuka byihuse, ku buryo kugeza ku munsi w’ejo ku Cyumweru tariki 12 Ukuboza 2021, Afurika y’Epfo yari ifite abantu baduye Covid-19 bagera ku 18.000.

Abagera kuri 70% by’abo barwayi ba Civd-19 bashya, bivugwa ko banduye virusi nshya ya Omicron. Gusa ngo abenshi muri abo banduye Covid-19 muri iyi minsi, usanga bafite ibimenyetso byoroheje, ku buryo ngo abakeneye gushyirwa ku mashini zibongerera umwuka usanga ari bakeya cyane.