Inkuru dukesha ikinyamakuru CNN ivuga ko mu ijambo yavugiye i Kyiv muri Ukraine, kuri uyu wa Mbere tariki 20 Gashyantare 2023, Perezida Biden yavuze ko “Putin arimo agenda atsindwa intambara yashoje.”

Ari kumwe na Perezida Zelensky wa Ukraine, Biden yagize ati “Putin yibwiye ko Ukraine idafite ingufu, kandi n’uburengerazuba bukaba bwaracitsemo ibice. Yatekereje ko tutamuhangara, ariko ubu sintekereza ko abona ko ibyo yibwiye byari byo”.

Ati “Putin yaribeshye gusa, kuko umwaka urashize, ikimenyetso cy’uko yibeshye ngiki muri iki cyumba. Dore turahagararanye”.

Mu biganiro bagiranye muri Perezidansi ya Ukraine, Biden yavuze ko uruzinduko rwe muri icyo gihugu kigiye kwinjira mu mwaka wa kabiri w’intambara kirwana n’u Burusiya, rugamije kwerekana ko Amerika ishyigikiye Ukraine muri iyo ntambara, mu buryo bwose kandi bidashidikanywaho.

Yagize ati “Abaturage ba Ukraine bagaragaje ugushikama ku buryo bukomeye, ku rwego rwagezweho na bake mu myaka yashize”.

Perezida Biden yavuze ko mu bituma Amerika ikomeza gushyigikira Ukraine mu ntambara irimo, ari ugushaka ko ikomeza kuba igihugu cyigenga, ariko no guharanira ubwigenge bwa ‘Demokarasi’ ku buryo bwaguye.