Rwamucyo yahamijwe ibyaha birimo kugambana hagamijwe gukora jenoside, ubufatanyacyaha muri jenoside, ndetse n’ubufatanyacyaha mu byaha byibasiye inyokomuntu.

Mu Ugushyingo 2024, Urukiko rwa Rubanda rwa Paris n’ubundi rwari rwahamije Dr Rwamucyo ibi byaha rumukatira igifungo cy’imyaka 27.

Dr Rwamucyo yahoze akora mu Kigo cy’Ubuzima Rusange cya Kaminuza y’u Rwanda (CUSP) akaba n’umwarimu muri Kaminuza Nkuru y’u Rwanda.

Ibyaha ashinjwa, bivugwa ko yabikoreye mu byari Komini Ngoma, Huye na Gishamvu zo muri Perefegitura ya Butare.

Icyagarutsweho muri uru rubanza kurusha ibindi, ni uburyo yashinyaguriye imibiri y’abatutsi yategetse ko bashyingura hifashishijwe ikimodoka gikora imihanda cya kateripilari cyabashyinguraga mu cyobo rusange hafi ya Paruwasi ya Nyumba.

Usibye gushyingura imibiri y’abatutsi bari bishwe, bivugwa ko muri icyo cyobo bashyinguyemo n’inkomere z’abatutsi bari bakiri bazima.