Papa Benedigito XVI yitabye Imana

Itangazo rya Vatican rivuga ko Papa Benedigito XVI yitabye Imana kuri uyu wa Gatandatu saa tatu n’iminota 34 (9:34), akaba yari aho yari atuye muri Vatican’s Mater Ecclesiae Monastery.

Ku wa gatatu w’iki cyumweru Papa Francis yahamagariye abakirisitu Gatolika kumusabira, kuko ngo yari arembye cyane.

Papa Benedigito wa XVI yabaye Umushumba mukuru wa Kiliziya Gatolika ku Isi wa 600, aba Papa imyaka 8 gusa, muri Gashyantare 2013 nibwo yatangaje ko yeguye kuri uyu mwanya ku mpamvu z’uburwayi.

Kwegura kwa Benedigito wa XVI, byaratunguranye ndetse bitangaza abantu benshi, kuko ubusanzwe Papa ava kuri uyu mwanya ari uko apfuye.

Amaze kwegura kuba Papa, mu mibereho ye ya buri munsi yabaga arimo gusoma ibitabo n’inkuru z’iyobokamana ndetse akomeza no kujya mu misa uko bisanzwe.

Arikiyepiskopi wa Kigali akaba n’Umuyobozi wa Diyosezi ya Kibungo muri Kiliziya Gatolika, Antoine Cardinal Kambanda, tariki ya 28 Ukuboza 2022 yari yasabye Abanyarwanda kwifatanya mu isengesho ryo gusabira Papa Benedigito XVI wari urembye.

Papa Benedigito XVI mu busaza bwe yatangaje ko Uhoraho yatwaye ijwi rye, ndetse ko yabyakiriye kuko ubu yavugaga gahoro cyane.

Papa Francis na we yabwiye ABC News ko n’ubwo Papa Benedigito XVI avuga gahoro cyane, ariko akurikirana ikiganiro aba agirana n’abo bari kumwe.

Ubwo Papa Francis yatumiraga ba Cardinal bo ku Isi kujya guhura i Roma na Papa Benedigito XVI, yabwiye Antoine Cardinal Kambanda ko agomba kujya asabira isi ndetse n’Abanyarwanda kuko ari Igihugu cyanyuze mu bintu bikomeye.

Kuva ku wa mbere w’icyumweru gitaha, Umurambo we uzatangira gusezerwaho muri Bazilika yitiriwe mutagatifu Petero i Vatican.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1463 )