Abapolisi bishwe baguye mu gitero cyagabwe kuri Sitasiyo ya Anambra ku wa mbere tariki 20 Gashyantare 2023, nk’uko byatangajwe n’Umuvugizi wa Polisi yahoo, Tochukwu Ikenga, aho yongeyeho ko batatu mu bagabye igitero nabo bishwe naho abandi babiri bagafatwa.

Polisi yatangaje ko abakekwa kuba bagabye icyo gitero cyahitanye abapolisi, ari abo mu itsinda ryitwa (Indigenous People of Biafra, cyangwa ‘IPOB’), riharanira ki agace k’Amajyepfo y’Uburasirazuba bwa Nigeria kabona ubwigenge kakiyomora ku gihugu.

Ikinyamakuru ‘Washingtonpost’ cyanditse ko abayobozi bashinja IPOB kuba iteza umutekano mukeya, umaze no kuba intandaro y’imfu nyinshi, ibyo ngo bikanakurura ubwoba n’impungenge mu baturage bibaza niba inzego z’umutekano za Nigeria zizashobora kurinda umutekano w’abatora.

Hari abaturage bamwe bashobora kuzabura uko batora Perezida wa Repubulika, bitewe n’uko batuye mu duce turimo umutekano muke, nk’uko byatangajwe na Komisiyo y’amatora muri Nigeria. Festus Okoye, umuyobozi muri Komisiyo y’amatora (Nigeria’s Independent National Electoral Commission), yavuze ko ibyo nta kindi babibokoraho.

Okoye yagize ati “Inzego z’umutekano zatanze icyizere ko zifite ubushobozi bwo kurinda abaturage kugira ngo bashobore gutora neza, ariko abatuye mu duce tukirimo intambara, ntacyo twashobora gukora rwose.”