Abanyeshuri biga ubuvuzi muri Nigeria bari bashimuswe barekuwe

Umuvugizi wa Polisi yo muri Nigeria, Olumuyiwa Adejobi kuri uyu wa Gatandatu tariki 24 Kanama 2024, yagize ati, “ Turemeza amakuru yo kurekurwa kw’abavandimwe bacu na bashiki bacu ndetse n’abandi Banya-Nigeria bacyeya bari barafashwe bugwate mu ishyamba rya Ntunkon, muri Leta ya Benue”.

Mu itangazo ryasohowe na Polisi y’igihugu kandi, ryemeje ko “Abo bose barekuwe nta mafaranga abanje kwishyurwa nk’ingurane, iryo tsinda ry’abantu ryarekuwe hakoreshejwe gusa ubuhanga n’ubunyamwuga bw’inzego z’umutekano za Nigeria”.

Fortune Olaye, Umunyamabanga mukuru w’Ishyirahamwe ry’Abanyeshuri biga ubuvuzi muri Nigeria (NIMSA), nawe yahamirije Ibiro Ntaramakuru by’Abafaransa AFP ko koko abo banyeshuri bose barekuwe kandi bameze neza.

Yagize ati, “ Twavuganye nabo kuri telefoni. Bameze neza”.

Abo banyeshuri bari bashimuswe biga ubuvuzi muri Kaminuza ebyiri zitandukanye zo muri icyo gihugu, bashimuswe n’abantu bo mu mitwe yitwaza intwaro, ubwo bari mu rugendo mu Burasirazuba bw’igihugu aho bari bitabiriye inama yo mu rwego rw’ubuvuzi, nk’uko byatangajwe n’ubuyobozi bw’izo kaminuza ndetse na Polisi yemeza ko irimo gukora ibishoboka byose kugira ngo bashobore kugarurwa.

Nk’uko byasobanuwe kandi Catherine Anene, ushinzwe imikoranire hagati ya polisi n’abaturage muri Leta ya Benue mu Burasirazuba bwa Nigeria, aho icyo gikorwa cyo gushimuta abo banyeshuri cyabereye, yavuze ko abanyeshuri umunani (8) bo muri Kaminuza ya Maiduguri (mu Majyaruguru ya Nigeria), baje kwihuza na bagenzi babo bo muri Kaminuza Jos, bakarara ijoro rimwe, mbere yo gutangira urugendo rwo kujya aho inama yagombaga kubera muri Leta ya Enugu, mu birometero 500 uvuye aho muri Kaminuza ya Jos.

Bari bashimutiwe hafi y’Umujyi wa Otukpo, mu gihe bari basigaje ibirometero 150 kugira ngo bagere aho Enugu, uwo muhanda bakoresheje kandi ngo ukaba ukunze kurangwamo ibitero by’iterabwoba n’ibikorwa byo gushimuta abantu.

Umunyamabanga mukuru w’ishyirahamwe ry’abanyeshuri biga ubuvuzi muri Nigeria (Nimsa), Fortune Olaye, yari yatangarije Ibiro ntamakuru by’Abafaransa ‘AFP’ ko “ Muri rusange abashimuswe ari abanyeshuri 20 n’umuganga umwe wari kumwe nabo,kandi ko ababashimuse basabaga amafaranga kugira ngo babarekure”.

Icyo gihe Umuvugizi wa Polisi y’igihugu cya Nigeria, Olumuyiwa Adejobi, yavuze ko hahise hoherezwa abapolisi benshi n’ibikoresho, mu rwego rwo gufasha Polisi yo muri Leta ya Benue.

Yagize ati, “ Mu buryo bwihuse, hahise hoherezwa umubare munini w’abapolisi n’ibikoresho mu rwego rwo gufasha Polisi yo muri Leta ya Benue, harimo indege za kajugujugu, indege zitagira abapilote (drones), n’imodoka zihariye zigenewe gukoreshwa mu bikorwa byo gutabara”.

Gushimuta abantu muri Nigeria, bikozwe n’abitwaje intwaro, ngo ibintu bimaze igihe kinini bikorwa ndetse inzego z’umutekano zikaba zisa n’izananiwe kubica burundu, kuko hari ubwo bashimuta abaturage, abanyeshuri cyangwa abamotari bigakurikirwa no gusaba imiryango yabo gutanga amafaranga nk’ingurane kugira ngo barekurwe cyane cyane mu Majyaruguru ya Nigeria.

Nubwo imibare yose y’abashimutwa ishobora kuba idatangazwa, ariko ikigo kitwa ‘SBM Intelligence’ cyo muri Nigeria, cyatangaje ko hari abantu 4.777 bashimuswe muri Nigeria mu gihe cy’ubutegetsi bwa Perezida Bola Ahmed Tinubu guhera muri Gicurasi 2023 kugeza muri Mutarama 2024.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 2101 )