Mozambique: Perezida Daniel Chapo yasuye inzego z’umutekano z’u Rwanda

Perezida wa Mozambique, Daniel Francisco Chapo yashimye byimazeyo uruhare rukomeye rw’inzego z’umutekano z’u Rwanda ziri mu Ntara ya Cabo Delgado, mu kugarura amahoro n’ituze muri iyo Ntara, ashimangira ko nta terambere ryagerwaho nta mahoro ahari.

Perezida Daniel Chapo yashimiye inzego z'umutekano z'u Rwanda
Perezida Daniel Chapo yashimiye inzego z’umutekano z’u Rwanda

Perezida Daniel Chapo, yabigarutseho kuri uyu wa Gatandatu tariki 29 Ugushyingo 2025, ubwo yasuraga inzego z’umutekano z’u Rwanda (Rwanda Security Force - RSF) ziri mu gace ka Ancuabe, Intara ya Cabo Delgado.

Perezida Chapo muri uru ruzinduko yari aherekejwe na Minisitiri w’Ingabo za Mozambique, Maj Gen Cristovão Artur Chume, Umugaba Mukuru w’Ingabo za FADM, Gen Julio dos Santos Jane, Umugaba w’Ingabo zirwanira ku butaka, Maj Gen André Rafael Mahunguane ndetse na Guverineri w’Intara ya Cabo Delgado, Valige Tauabo.

Perezida wa Mozambique n’intumwa yari ayoboye bakiriwe n’Umuhuzabikorwa w’inzego z’umutekano z’u Rwanda ziri muri Mozambique, Maj Gen Vincent Gatama, amugaragariza ishusho y’imitere y’umutekano mu gace RSF ifite mu nshingano.

Perezida Daniel Chapo, yahuye n’abasirikare ndetse n’abapolisi bagize inzego z’umutekano z’u Rwanda, abashimira akazi gakomeye bakoze bafatanyije n’ingabo za Mozambique (FADM), mu kurwanya iterabwoba. Yasabye izi ngabo kurushaho gukaza umurego mu rugamba rwo guhashya ibikorwa by’iterabwoba.

Yagize ati “Ndashimira cyane Ingabo z’u Rwanda ku kazi k’igitangaza zidahwema gukora hano muri Mozambique, kadufashije kugarura umutekano muri iyi Ntara. Mukomeze gukorana n’abavandimwe banyu, kuko nta terambere ryagerwaho hatari amahoro n’umutekano.”

Perezida Chapo yibukije kandi ko iterabwoba atari ikibazo cya Mozambique gusa, ahubwo ko ari ikibazo gihangayikishije Isi yose, bityo ko ubufatanye bukomeye hagati y’Inzego z’umutekano z’u Rwanda (RSF) n’Ingabo za FADM ari ingenzi.

Yashimangiye ko hari imishinga inyuranye igiye gusubukurwa, bityo ko amahoro n’umutekano ari ingenzi cyane kugira ngo ibashe kuramba mu gihe kirekire.

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka