Ku nshuro ya mbere Ukraine yarashe mu Burusiya misile zigera kure

Yanditswe na

Ruzindana Janvier

19-11-2024 - 22:27' | Ibitekerezo ( )

Ku nshuro ya mbere, Ukraine yarashe ku butaka bw’u Burusiya misile zigera kure, nyuma y’uko Amerika yemereye iki gihugu gutangira kugaba ibitero gikoresheje izo ntwaro.

Ku nshuro ya mbere Ukraine yarashe mu Burusiya misile zigera kure

Abayobozi bo muri Amerika bemeje ko hakoreshejwe Army Tactical Missile System (ATACMS) nk’uko ibinyamakuru birimo CBS na BBC byabitangaje.

Minisitiri w’Ingabo w’u Burusiya, yavuze ko icyo iyo misile yarashwe mu gitondo cyo kuri uyu wa kabiri, mu Karere ka Bryansk gahana imbibi na Ukraine mu Majyaruguru.

Misile eshanu (5) zahanuwe mu gihe indi imwe yangiritse ikanateza inkongi mu kigo cya gisirikare muri ako Karere, nk’uko byatangajwe na Minisitiri w’Ingabo w’u Burusiya.

Minisitiri w’Ububanyi n’Amahanga, Sergey Lavrov yashinje Amerika gutuma intambara irushaho gukomera. Yagize ati: "Kuba ATACMS yakoreshejwe mu Karere ka Bryansk n’ikimenyetso ko bashaka [Amerika] ko intambara ikomera kurushaho."

Yakomeje avuga ko Ukraine iramutse idafashijwe na Amerika itabasha gukoresha izo ntwaro kubera ikoranabuhanga rikomeye zifite

Yavuze ko Igihugu cye gishobora kwemeza ko izo misile ziri gukoreshwa n’abahanga mu bya gisirikare bo muri Amerika.

Ubwo yaganiraga n’itangazamakuru aho yitabiriye inama ya G20 iri kubera mu Mujyi wa Rio de Janeiro, yagize ati:"Tuzafata ibi nk’indi sura y’intambara y’Abanyaburayi ku Burusiya kandi tuzabishyura ku buryo bungana."

Kuri uyu wa kabiri, u Burusiya bwahinduye amategeko agenga ikoreshwa ry’intwaro za kirimbuzi, agena ko bushobora kuzikoresha.

Aya mategeko agena ko ubushotoranyi bukorewe u Burusiya bukozwe n’Igihugu kidafite intwaro za kirimbuzi ariko gishyigikiwe n’ikizifite, bufatwa nk’ubushotoranyi buhuriweho. Ibi biri mu bishobora gutuma u Burusiya bukoresha izo ntwaro.