Perezida Biden yagize ati "Nk’igihugu ntitwakwemera ko ibi bikomeza kutubabaza, tugomba guhagarara tukanga gucibwa intege n’agahinda".

Perezida wa Amerika na Visi Perezida n’abo bashakanye, bafashe umwanya wo guceceka imbere ya Perezidansi ya Amerika, mu muhango wo gucana za buji bunamira abahitanywe na Covid-19.

Perezida Biden asaba Abanyamerika gufatanya mu kurwanya Covid-19. Yagize ati "Uyu munsi ndasaba Abanyamerika bose kwibuka. Kwibuka abo twabuze bose no kwibuka abo twasize inyuma".

Mu rwego rwo kunamira Abanyamerika bose bamaze guhitanwa na Covid-19, Perezida Biden yategetse ko amabendera y’igihugu yururutswa akagera mu cya kabiri, agakomeza yururukijwe mu gihe cy’iminsi itanu.

Atangira ijambo rye yavugiye aho kuri Perezidansi ya Amerika, yavuze ko umubare w’Abanyamerika bamaze kwicwa na Covid-19 uruta kure umubare w’abaguye mu ntambara ya mbere y’Isi n’iya Kabiri ndetse n’iyo muri Vietnam bose babariwe hamwe.

Perezida Biden yagize ati “Uyu munsi tubabajwe no kuba ubu turi aba mbere mu bintu bibabaza umutima, abantu 500,071 bamaze gupfa".

Ati "Kenshi twumva abantu babavuga nk’Abanyamerika basanzwe, ariko si byo, nta kintu gisanzwe kuri bo, abantu twatakaje bari abantu badasanzwe, bubaka igihugu. Bavukiye muri Amerika cyangwa se ari abimukira baje muri Amerika. Abenshi muri bo bahumetse umwuka wabo wa nyuma bari bonyine muri Amerika."

Perezida Biden yumva umubabaro w’ababuze ababo kuko na we ngo yapfushije umugore we n’umukobwa we mu mpanuka y’imodoka mu 1972, n’umwe mu bahungu be yishwe na kanseri y’ubwonko mu 2015.

Yagize ati "Nzi uko bimera kubura uwawe bikanaba udahari, nzi uko bimera iyo ufashe mu biganza byabo, hari indoro iba iri mu maso yabo igera ahantu kure" .

Tariki 19 Mutarama 2021, umunsi umwe mbere y’uko Biden aba Perezida wa Amerika, yateguye igikorwa cyo kuzirikana Abanyamerika 400,000 bari bamaze kwicwa na Covid-19.

Abamaze kwandura Covid-19 muri Amerika muri rusange bagera kuri miliyoni 28.1, igakurikirwa n’u Buhinde bufite abamaze kwandura bagera kuri miliyoni 11 mu gihe ku mwanya wa gatatu hari Brazil ifite abamaze kwandura icyo cyorezo bagera kuri miliyoni 10.1 nk’uko bitangazwa na Kaminuza yitwa ‘Johns Hopkins University’.