Iyo mibare ’WHO’ yayitangaje, ishingiye ku bwiyongere bw’umubare w’abandura icyo cyorezo ndetse n’uko abantu ngo bakomeje kwanga kwikingiza.

Kuri uyu wa Mbere tariki 30 Kanama 2021, ni bwo Umuyobozi wa ’WHO’ mu Burayi, Hans Kluge, yatangaje ko imibare y’abandura virusi ya Covid-19 yihinduranyije ’Delta’ irimo kuzamuka, cyane cyane mu batarakingirwa icyo cyorezo.

Yagize ati "Mu Cyumweru gishize, habayeho ubwiyongere bwa 11% by’impfu ziturutse kuri Covid-19, bivuze ko kugeza tariki ya 1 Ukwakira 2021, abahitanwa na Covid-19 mu Burayi bazaba biyongereyeho abagera ku 236.000".

Kugeza ubu ngo umubare w’abamaze kwicwa na Covid-19 ku Mugabane w’u Burayi bagera kuri Miliyoni 1.3 mu gihe abanduye icyo cyorezo muri rusange kuri uwo Mugabane bagera kuri Miliyoni 64.

Hans Kluge, avuga ko mu bihugu 53 by’ibinyamuryango bya ’WHO’, 33 muri byo byagize 10% by’ubwiyongere bw’abandura Covid-19 mu byumweru bibiri bishize, kandi ibyinshi muri byo ngo ni ibihugu bikennye.

Hans Kluge avuga ko ubwo bwiyongere bw’abandura Covid-19 ’Delta’ mu Burayi, bituruka k’ukuba, ibihugu byinshi byo kuri uwo Mugabane byaroroheje ingamba zo kwirinda, abantu batangira no gukora ingendo zo kujya mu biruhuko, n’ibindi nk’uko byanditswe n’ikinyamakuru Aljaazira dukesha iyi nkuru.

Ibiro ntaramakuru by’Abafaransa ’AFP’, ejo tariki 30 Kanama 2021, byatangaje ko mu bihugu bigize Umuryango w’Ubumwe bw’u Burayi, abaturage bagera kuri 58.7%, ni ukuvuga abagera kuri Miliyoni 262.3, ni bo bamaze guhabwa inkingo zuzuye za Covid-19.