Ethiopian Airlines yongeye gufungura ingendo zijya muri Tigray

Kompanyi y’indege y’Igihugu cya Ethipia, Ethiopian Airlines, yatangaje ko igiye kongera gufungura ingendo z’ubucuruzi mu gace ka Tigray, nyuma y’uko hari hashize amezi 18 itahagera bitewe n’intambara.

Iyo Kompanyi yatangaje ibyo nyuma y’uko itsinda riturutse muri Guverinoma ya Ethiopia, riherutse gukora uruzinduko rwa mbere muri ako gace ka Tigray, nyuma y’amasezerano y’amahoro aherutse gusinywa hagati y’imbande zombi mu kwezi gushize k’Ugushyingo 2022.

Ethiopian Airlines, ni yo Kompanyi nini y’indege muri Afurika, ikaba yatangaje ko itangira ingendo zayo ziva i Addis Ababa zerekeza mu Murwa mukuru wa Tigray, Mekele, kuri uyu wa Gatatu tariki 27 Ukuboza 2022, kandi ikazajya ijyayo buri munsi, umubare w’ingendo ikorerayo ku munsi zikaba ziziyongera bijyanye n’uko abagenzi bayikeneye bangana, nk’uko byasobanuwe mu itangazo ryasohowe n’iyo Kompanyi.

Umuyobozi mukuru wa Ethiopian Airlines Group, Mesfin Tasew yagize ati "Mu by’ukuri dushimishijwe n’uko kongera gufungura ingendo. Izi ngendo zizafasha imiryango kongera guhura, kuzahura ibikorwa by’ubucuruzi, kongera kubyutsa ubukerarugendo n’andi mahirwe menshi afasha abaturage kumererwa neza."

Kuva amasezerano y’amahoro yasinywa hagati ya Guverinoma ya Ethiopia n’agace ka Tigray ku itariki 2 Ugushyingo 2022, imfashanyo zitandukanye zatangiye kubona uko zigera muri Tigray, bikaba birimo gukemura ikibazo cyari kimaze iminsi muri ako gace, cy’ibura ry’ibiribwa, lisansi, amafaranga (cash) ndetse n’imiti.

N’ubwo bimeze bityo, hari abaturage bagera kuri Miliyoni esheshatu badafite umuriro w’amashanyarazi n’itumanaho rya Telefoni, mu gihe igice kimwe ari cyo cyatangiye kongera kubona serivisi za Banki n’iza Interineti.

Ku itariki 6 Ukuboza 2022, ni bwo ibice bimwe na bwimwe bya Tigray byatangiye gushyirwa ku muyoboro mugari w’amashanyarazi w’igihugu (national electricity grid), naho ku itariki 19 Ukuboza 2022, Banki y’ubucuruzi nini muri icyo gihugu ‘Commercial Bank of Ethiopia’, yatangaje ko serivisi zayo zongeye gufungura mu Mijyi imwe n’imwe yo muri Tigray.

Intambara hagati ya Guverinoma ya Ethiopia n’abarwanyi bo muri Tigray ‘Tigray People’s Liberation Front (TPLF)’, yatangiye mu Kwezi k’Ugushyingo 2021, Umuryango w’Abibumbye ukaba waratangaje ko yahitanye ubuzima bw’abagera ku bihumbi magana atanu (500.000), mu gihe abandi ibihumbi amagana bakuwe mu byaho, ndetse bagahura n’ikibazo cy’inzara gikomeye.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka