Perezida Mnangagwa yongeye gutorerwa indi manda yo kuyobora Zimbabwe

Nk’uko byatangajwe na Komisiyo ishinzwe amatora muri Zimbabwe (ZEC), Mnangagwa w’imyaka 80, yatsinze amatora ku majwi 52,6% naho Nelson Chamisa w’imyaka 45, wahabwaga amahirwe yo kwegukana intsinzi agira amajwi 44%.

France 24 yatangaje ko abatavuga rumwe n’ubutegetsi ndetse n’indorerezi mpuzamahanga. banze kwemera ibyavuye muri aya matora, bakavuga ko yakozwe mu buryo butubahirije amahame ya Demokorasi.

Nubwo amashyaka atavuga rumwe na Leta atishimiye iyi ntsinzi, Perezida wa Komisiyo ishinzwe amatora, Justice Chigumba, yabwiye abanyamakuru ko Mnangagwa Emmerson Dambudzo wo mu ishyaka rya ZANU-PF, yatangajwe ko yatorewe kuba Perezida wa Repubulika ya Zimbabwe mu buryo bukwiye.

Chigumba yavuze ko Mnangagwa yagize amajwi arenga miliyoni 2.3, Chamisa akagira arenga miliyoni 1.9.

Ishyaka ZANU-PF ryihariye imyanya myinshi mu matora y’Abadepite, kuko ryegukanye imyanya 136 kuri 210.

Ku wa gatatu no ku wa kane mu cyumweru gishize, Abanya-Zimbabwe bazindukiye mu gikorwa cy’amatora ya Perezida wa Repubulika n’ay’Abadepite, ariko hagaragaramo amakosa yo gutangira atinze bituma abatavuga rumwe na Leta, ndetse n’indorerezi zo ku rwego mpuzamahanga bavuga ko hagamijwe kwiba amajwi.

Abayoboke b’ishyaka riri ku butegetsi muri Zimbabwe rya ZANU-PF, bishimiye intsinzi ya Mnangagwa Emmerson.

Abatavuga rumwe na Leta bavuga ko imyaka Perezida Mnangagwa amaze ayobora iki gihugu, ubukungu bwacyo butifashe neza bakanamushinja kuba umunyagitugu.