DRC: Agahenge kemeranyijweho katangiye kubahirizwa

Yanditswe na

Ernestine Musanabera

13-08-2024 - 23:45' | Ibitekerezo ( )

Minisitiri w’ububanyi n’amahanga muri Repuburika Iharanira Demokarasi ya Congo (DRC), Thérèse Kayikwamba yavuze ko bashima intambwe yatewe mu kubahiriza agahenge.

Thérèse Kayikwamba minisitiri w'ububanyi n'amahanga wa DRC yavuze ko bashima intambwe yatewe mu kubahiriza agahenge

Mu kiganiro n’abanyamakuru, Kayikwamba yavuze ko intambwe yatewe ishimishije mu kubahiriza amasezerano y’agahenge ku mirwano ibera muri Burasirazuba bwa Repuburika iharanira Demokarasi ya Congo.

Ibi yabitangaje nyuma y’ibiganiro byihariye hagati ya Perezida Félix Tshisekedi wa DRC na João Lourenço wa Angola byabaye ku mugoroba wa tariki 12 Kanama 2024.

Ati: “Mu by’ukuri agahenge karubahirijwe rero tuzakomeza kuganira kuri ibi bibazo kugira ngo birangire”.

Nubwo agahenge kasabwe ngo hagiye hagaragara ibikorwa bimwe na bimwe bito byo kutukubahiriza aho mu bice bimwe byo mu Burasirazuba hagiye humvikana imirwano.

Minisitiri Téte António wa Angola nawe wari witabiriye ikiganiro n’abanyamakuru yibukije ko hari urwego rwashyizweho rwo kugenzura iyubahirizwa ry’agahenge kandi ruzongererwa imbaraga kugira ngo rubashe kuzuza neza inshingano zarwo.

Perezida Lourenço yagiye muri Repuburika iharanira Demokarasi ya Congo ku wa mbere, nyuma y’uko yari mu Rwanda ku cyumweru mu muhango wo kurahira kwa Perezida Paul Kagame.

Ibiganiro bya Perezida wa RDC, Tshisekedi na mugenzi we Lourenço byabereye mu muhezo, mu gihe icyemezo cyo guhagarika imirwano hagati y’impande zishyamiranye mu Burasirazuba bwa RDC cyafatiwe i Luanda tariki ya 30 Nyakanga 2024.

Perezida Félix Tshisekedi wa DRC na mugenzi we João Lourenço wa Angola bagiranye ibiganiro byihariye ku bibazo by'umutekano mu burasirazuba

Inama yabereye i Luanda tariki ya 30 Nyakanga, abayitabiriye banzuye ko ibiganiro bizakomeza, hagamijwe kugira ngo amahoro n’umutekano birambye biboneke mu burasirazuba bwa RDC.

Nubwo hasabwa agahenge mu guhagarika imirwano mu Burasirazuba bwa Congo haracyari imbogamizi ku ishyirwa mu bikorwa ry’uyu mwanzuro kuko Leta ya RDC yagaragaje ko idateze kuganira na M23 kuko iwita umutwe w’iterabwoba.

Ukwinangira kwa Leta ya RDC gushobora gutuma intambara ikomezagahati y’Ingabo zayo na M23.

Umutwe wa M23 wafashe intwaro mu rwego rwo kwirengera kubera ibikorwa by’ubwicanyi bikorerwa bikanibasira Abanyecongo bo mu bwoko bw’Abatutsi bavuga ururimi rw’Ikinyarwanda.

Agahenge kari kemeranyijweho katangiye tariki 04 Kanama 2024, gusa ariko mbere y’amasaha gatangire kubahirizwe, hatangajwe ko umutwe wa M23 wakomeje imirwano ndetse unatangaza ko ako gahenge katayireba kuko mu biganiro byabaye batigeze babyitabira kuko nta butumire bwabyo bahawe unatangaza ko ayo masezerano ya Luanda areba abayasinye.