Bobi Wine mu mazi abira kubera imodoka ye idatoborwa n’amasasu

Bobi Wine umwe mu b’ingenzi batavuga rumwe n’ubuyobozi muri Uganda ari mu mazi abira nyuma y’amakuru avuga ko ashobora kuba afite imodoka idatoborwa n’amasasu.

Amakuru aturuka muri Uganda aravuga ko iyo modoka yateje impagarara mu buyobozi, ikigo cy’imisoro n’amahoro cya Uganda (URA), nacyo kiravuga ko iyo modoka bayibeshyeho bakayiha agaciro kari munsi y’ako ifite, bityo ikaba igomba kongera gukorerwa isuzumwa.

Bobi Wine ubusanzwe witwa Robert Kyagulanyi yanze gusubiza iyo modoka, avuga ko nta tegeko ribisaba rihari nk’uko itangazo ryashyizweho umukono n’umwunganira mu mategeko ribivuga.

Iryo tangazo riragira riti “Ni byo rwose, mu gika cya 236(d) cy’itegeko rigenga Imicungire ya Gasutamo y’umuryango wa Afurika y’Iburasirazuba (EAC Customs Management Act), mufite ububasha bwo kugenzura imizigo, ariko ntimufite ububasha bwo kongera kugenzura ibyamaze gusohoka mu bubiko bwanyu nyuma yo gusuzumwa no gukorerwa igenzura ry’umusoro ukishyurwa n’ibicuruzwa bigashyikirizwa nyirabyo/usora”.

Iyo modoka ya Bobi Wine yabanje gutumizwa ndetse inandikwa muri Kenya mu mwaka ushize, hanyuma iza kongera gutumirizwa muri Uganda inyuze ku mupaka wa Busia.

Mu butumwa Bobi Wine aheruka gushyira kuri twitter ku wa 21 Gashyantare 2021, yavuze ko iyo modoka yo mu bwoko bwa Toyota Land Cruiser yayigabiwe n’inshuti ze n’abandi bamushyigikiye muri Uganda no mu mahanga.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka