Joe Biden ku wa Kabiri w’iki cyumweru yategetse Inzego z’iperereza za Amarika gukuba kabiri ingufu zikoresha mu gushaka inkomoko nyayo ya Covid-19, ndetse azibwira ko zigomba kuba zatanze raporo mu minsi itarenze 90.

Ibyavuzwe ko Covid-19 yaba yarakomotse muri Laboratwari yo mu Bushinwa byagiye bihakanwa n’inzobere zitandukanye. Joe Biden akaba yibukije ko imirimo y’inzego z’iperereza za Amerika igikomeje, kandi ko bagendera ku bintu bibiri byavuzwe ko bishobora kuba ari iyo nkomoko ya Covid-19.

Ibyo bintu bibiri inzego z’iperereza za Amerika zizagenderaho mu gushaka inkomoko ya Covid-19, hari ukuba ngo yarakomotse mu nyamaswa, nyuma ikagera ku bantu, ikindi ni ukuvuga ko yaba yaravuye muri laboratwari mu Bushinwa ku mpamvu z’impanuka.

Biden ati “Leta zunze bumwe za Amerika zizakomeza gukorana n’abafatanyabikorwa bazo hirya no hino ku isi mu gushyira igitutu ku Bushinwa kugira ngo bwemere kugira uruhare mu iperereza mpuzamahanga ryuzuye, rinyuze mu mucyo, kandi rishingiye ku bimenyetso”.

Perezida Biden yongeyeho ko ababazwa cyane n’ukuntu u Bushinwa bwitwara kuri icyo kibazo cyo gushakira hamwe inkomoko nyayo ya Covid-19.

Tariki 26 Gicurasi 2021, amasaha make mbere y’uko iryo tangazo rya Joe Biden ritangazwa, Pékin yari yatangaje ko Washington itangaza ibintu bitari ukuri ku nkomoko ya Covid-19.

U Bushinwa ntibwigeze buhwema guhakana imvugo y’uko ngo Covid-19 yaba yaraturutse muri laboratwari zo muri icyo gihugu, by’umwihariko mu Kigo cya Wuhan kigisha ibya za virusi (Institut de virologie de Wuhan).

Mu ntangiriro z’uyu mwaka wa 2021, nyuma y’ibyumweru bine itsinda ry’inzobere za ‘OMS’ zamaze i Wuhan, zakoze inyigo zihuriyeho n’inzobere z’u Bushinwa, nyuma muri Werurwe uyu mwaka, izo nzobere zose ziri hamwe zitanga umwanzuro uvuga ko ukuri ko kuba iyo virusi yaba yaraturutse muri Laboratwari ari guke cyane.

Abantu ba mbere barwaye Covid-19 babonetse i Wuhan mu Bushinwa mu mu 2019, nyuma iyo virusi ikwira ku isi yose, ubu ngo ikaba imaze guhitana abantu bagera hafi kuri miliyoni 3.5 ku isi.