KT TV
Abasirikare bashya 545 batojwe na RDF binjiye mu Ngabo za Santrafurika
Perezida wa Repubulika ya Santrafurika, Prof. Faustin Archange Touadéra, yayoboye umuhango wo kwinjiza ku mugaragaro mu Ngabo za Repubulika ya Centrafrique (FACA), abasirikare bashya 545 barangije amahugurwa y’ibanze ya gisirikare bahawe n’abarimu b’Ingabo z’u Rwanda (RDF).
Uyu muhango wabaye kuri uyu wa Gatandatu tariki 29 Ugushyingo 2025, wabereye mu kigo cya gisirikare cya Camp Kassai giherereye i Bangui, witabirwa kandi n’Umugaba w’Ingabo z’u Rwanda zirwanira ku butaka, Maj Gen Vincent Nyakarundi.
Muri uyu muhango kandi hari aba Suzofisiye 121 barangije amahugurwa y’amezi atandatu yo kuyobora, na yo yatanzwe n’abarimu b’Ingabo z’u Rwanda (RDF).
Gen Victor Yacoub, Umugaba Mukuru w’Ingabo za FACA, yashimye ubufatanye bukomeye hagati y’u Rwanda na Santrafurika, cyane cyane mu bijyanye no guhugura abasirikare. Yavuze ko kugeza ubu RDF yamaze guhugura abasirikare 2,409 baba binjiye bushya ndetse n’aba Suzofisiye 300.
Yashimye kandi abasoje amasomo ku murava n’ikinyabupfura bagaragaje mu gihe cy’amezi atandatu bamaze bahugurwa.
Maj Gen Nyakarundi, Umugaba w’Ingabo z’u Rwanda zirwanira ku butaka, yahaye impanuro aba basirikare basoje aya mahugurwa, ko bakwiye gukomeza gutanga urugero rwiza ku bo bayobora, gutunganya akazi kabo neza barangwa n’ubunyamwuga n’ikinyabupfura mu gukorera igihugu cyabo, no kuba abajyanama beza ku babakuriye.
Yanashimye kandi ubufasha bwatanzwe n’abakuru b’ibihugu byombi, mu gushyigikira iyi gahunda yo gutoza abasirikare.
Ibi birori byaranzwe no kugaragaza bumwe mu bumenyi bungutse, harimo imyitozo njyarugamba, kurasa, kugendera ku makarita ya gisirikare n’ibindi.
Ibitekerezo
Ohereza igitekerezo
|
|
