Muri Kenya imyigaragambyo imaze gufata indi ntera

Polisi yarashe ibyuka biryana mu maso, imisha n’amazi mu rwego rwo gutatanya ibigaragambya mu Murwa mukuru wa Kenya, Nairobi, nk’uko byatangajwe mu itangazo ryasohowe n’imiryango itari iya Leta harimo ‘Amnesty International’ na ‘Association médicale du Kenya’.

Hari kandi ibisigazwa by’amasasu byasanzwe ahabera imyigaragambyo, bigaragaza ko abatatanya abigaragambya bakoresheje n’amasasu nyayo, kuko hari n’umuntu wapfuye nyuma yo gukomeretswa n’isasu aho muri Nairobi nk’uko byatangajwe n’ikinyamakuru cya Daily Nation.

Hari gukoreshwa ibyuka biryana mu maso

Abigaragambya bashaka ko Guverinoma ya Kenya ireka burundu itegeko rigena iby’imari, kuko babona ko rizabangamira cyane ubukungu ndetse ritaguma ubuzima burushaho guhenda ku baturage ba Kenya kandi n’ubusanzwe bamaze igihe bataka ko ubuzima buhenze.

Mu ntangiriro z’iki cyumweru cyatangiye ku itariki 17 Kamena 2024, Guverinoma ya Kenya yari yabaye nk’ihindura gato gahunda ku misoro imwe n’imwe, kuko Perezida William Ruto, yemeje imyanzuro yo gukuraho imisoro ku batunze imodoka, ku mugati, ku mavuta yo gutekesha ndetse no kuri serivisi zimwe na zimwe zo guhererekanya amafaranga, nk’uko byatangajwe n’Ikinyamakuru Zonebourse.

Umupolisi mukuru yacitse amaboko yombi arimo ahosha imyigaragambyo

Ku rundi ruhande, abapolisi babiri bakomeretse bikomeye, mu gihe barimo bagerageza guhosha iyo myigaragambyo mu Mujyi wa Nairobi, harimo umwe w’umugore wakomeretse cyane mu gatuza, ndetse n’umwe mu bapolisi bakuru ba Kenya, Inspector of Police David Maina, uri mu bitaro nyuma yo gucika amaboko yombi, akomerekejwe n’igisasu gitera ibyuka biryana mu maso nk’uko byatangajwe n’ikinyamakuru The Citizen TV Kenya.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 2135 )