Santrafurika: Ingabo z’u Rwanda zashimiwe uruhare mu kugarura amahoro no kwita ku buzima bw’abaturage

Yanditswe na

Umukazana Germaine

5-10-2024 - 00:01' | Ibitekerezo ( )

Ingabo z’amahoro z’u Rwanda zibarizwa mu matsinda ya Battle Group VI ndetse na RWAMED IX Level 2+ Hospital, ziri mu butumwa bw’Umuryango w’Abibumbye bwo kugarura amahoro muri Santrafurika, MINUSCA, zashimiwe uruhare rwazo harimo no kwita ku buzima bw’abaturage zishinzwe kurindira amahoro.

Ingabo z'u Rwanda zambitswe imidali y'ishimwe

Ni ibyagarutsweho mu muhango wabaye kuri uyu wa Gatanu tariki 4 Ukwakira 2024, wo kwambika Ingabo z’u Rwanda zibarizwa muri ayo matsinda abiri, imidali yishimwe kubera ibikorwa by’indashyikirwa bijyanye no kubungabunga amahoro muri Santrafurika.

Muri iki gikorwa cyabereye ku cyicaro cy’Ingabo z’u Rwanda cya Bria, giherereye mu gace kari mu Burasirazuba, muri Perefegitura ya Haute-Kotto, Umugaba w’Ingabo za MINUSCA, Brig Gen Simon Ndour, yashimye ingabo z’u Rwanda kubera ubuhanga bwazo, imyitwarire myiza n’umusanzu wazo ufatika zatanze.

Uyu muhango wabereye ku cyicaro cy'Ingabo z'u Rwanda

Brig Gen Simon Ndour, yashimye uruhare rw’itsinda rya Battle Group, ry’Ingabo z’u Rwanda mu kugarura amahoro mu duce twa Bria, Ouadda, na Sam-Ouandja, anashimira RWAMED IX kubera serivisi z’ubuvuzi zahawe abakozi ba Loni ndetse n’abaturage bo muri utwo duce.

Col Dr. Theogene Rurangwa, Umuyobozi wa RWAMED IX, yagaragaje umuhate w’Ingabo z’u Rwanda zishinzwe kugarura amahoro kuva zakoherezwa mu Kuboza 2023.

Ingabo z'u Rwanda zashimiwe uruhare mu kugarura amahoro no kwita ku buzima bw'abaturage

Yavuze ko itsinda rya Battle Group VI, rishinzwe ibijyanye n’urugamba, ryakoze ibikorwa birimo amarondo, ryita ku mutekano no gufasha mu koroshya ibikorwa by’ubutabazi, mu gihe RWAMED IX yatanze serivisi z’ubuzima ku bantu barenga 1.713, barimo 31 bari bakeneye kubagwa kandi bigenda neza.

Umuhango wo kwambika imidali Ingabo z’u Rwanda, wasojwe n’ibirori by’imbyino gakondo byakozwe n’Ingabo z’u Rwanda ziri mu butumwa bw’Umuryango w’Abibumbye bwo kubungabunga amahoro muri Repubulika ya Santrafurika (MINUSCA).