Mu gitondo cyo kuri iki Cyumweru tariki ya 22 Werurwe 2020, mu Rwanda hatangiye uburyo bwo gukaza ingamba mu kwirinda icyorezo cya COVID 19, zimwe muri izo ngamba zikaba zirimo guhagarika ingendo, n’ubucuruzi bitihutirwa.

Mu muhanda inzego za Polisi zari ziri kugenzura uko ibinyabiziga byubahiriza ayo mabwiriza, bikaba byagaragaraga ko za moto, imodoka n’amagare bitari kugenda nk’uko byari bisanzwe usibye ibipakiye imizigo yiganjemo ibyo kurya.

Aho abantu bategera imodoka ho nta muntu wari uhari kuko imiryango yari ifunze nk’uko amabwiriza ya Minisitiri w’Intebe abiteganya, abayobozi na bo bari kugenzura niba koko ayo mabwiriza ashyirwa neza mu bikorwa.

Umuyobozi w’Urugaga rw’Abikorera (PSF) ushinzwe gukemura impaka mu Karere ka Muhanga, Mupagasi Fidele, yabwiye Kigali Today ko ibintu biri kugenda neza muri rusange kuko abari bafite impungenge zo guhaha ibyo kurya basanze imiryango y’aho bicururizwa ifunguye.

Cyakora yavuze ko abaturage bakigaragara mu buryo butubahirije metero imwe hagati y’umuntu n’undi, ibyo bikaba byabakururira ibihano cyangwa kuba bakwandura icyorezo cya COVID-19, gusa ngo ubukangurambaga burakomeje kugeza babyumvise.

Agira ati “Abaturage bari guhaha nta kibazo, ibiciro na byo turi kubigenzura hari aho byazamutse, hari n’aho bari gucuruza neza, turasaba ko amabwiriza akomeza kubahirizwa kugira ngo ingamba zafashwe zitange umusaruro ikibazo gikemuke vuba abantu basubire mu mirimo yabo”.

Abacuruzi baranguza na bo bagaragaza ko ibiciro ku biribwa nta cyahindutse kandi ko biteguye kwakira abaza kurangura, ibyo bikaba bisubiza ibibazo by’abavugaga ko kugera aho barangurira bishobora kubagora.

Ntayomba Eric, uranguza ibyo kurya mu Mujyi wa Muhanga avuga ko ibiciro bitazamutse nk’uko hari aho biri kuvugwa, kandi ko bafite ibicuruzwa bihagije ku buryo nta wagira impungenge z’uko abahaha byinshi bashobora kubimara ku isoko.

Ati “Turi gucuruza imiceri akawunga, amasukari byose nta biciro byahindutse, turi gukurikiza amamwiriza kandi n’abakiriya bacu ntibahangayike twiteguye kubakira, turi gukorana neza n’inzego z’ubuyobozi n’umutekano nta kibazo dufite”.

Abacuruza ibirayi banamanitse ibiciro ku miryango nk’uko amabwiriza abiteganya bavuga ko abakiriya babuze kuko bari kugura ibyo kurya bimara igihe, ibirayi bikaba byatangiye kubangirikiraho.

Ibiciro by’ibirayi kuri iki cyumweru byari amafaranga 220 ku kilo, igitoki cyari 200na 220/kg, inyama ni 2,500/kg, abacuruzi n’abaza kugura ibyo kurya bakaba basabwa gukomeza kubahiriza amabwiriza ya Minisitiri w’Intebe yo kwitwararika mu kwirinda COVID-19.

Andi mafoto: