Iyi nama y’iminsi itatu yatangiye kuri uyu wa Gatanu tariki 04 Ukwakira 2024, Minisitiri Marizamunda yayitabiriye ari kumwe na Brig Gen Ronald Rwivanga, Umuvugizi w’Igisirikare cy’u Rwanda (RDF). Iyi nama iri kubera muri Afurika y’Epfo ikazasozwa ku ya 7 Ukwakira.

Ni inama yitabiriwe n’abanyacyubahiro bo ku rwego rwo hejuru ku mugabane wa Afurika barimo Thabo Mbeki, wanashinze umuryango utegura iyi nama, Visi Perezida wa guverinoma y’inzibacyuho ya Sudani y’Epfo, Abaminisitiri b’ububanyi n’amahanga ba Zimbabwe na Tanzaniya na Minisitiri w’Ingabo muri Liberiya n’abandi batandukanye.

Ikigamijwe muri iyi nama ngarukamwaka ku mahoro n’umutekano muri Afurika ni ugutanga urubuga ku bayobozi mu rwego rwa Politiki n’ubukungu muri Afurika, intiti, n’abari mu myanya ifata ibyemezo mu kuganira ku bibazo by’amahoro n’umutekano byugarije uyu mugabane, gusangira ibikorwa byiza byagezweho, no gushaka ibisubizo mu buryo bufatika.

Iyi nama n’ibiganiro biberamo byose bigamije kurushaho gusobanukirwa no kuzamur ibiganiro mpaka ku bisubizo byavana umugabane w’Afurika ku bibazo by’amahoro n’umutekano biwugarije.

Umugabane wa Afurika wahuye n’ibibazo n’amakimbirane bitandukanye, umutekano muke, byagiye bigira ingaruka ku iterambere ry’ubukungu n’imibereho myiza. Ibibazo bituruka ku makimbirane yo mu gihugu imbere, ibikorwa by’iterabwoba, ibyaha bihererekanywa n’udutsiko, ndetse n’ibibazo bituruka hanze.

Umuryango wa Thabo Mbeki, mu gutegura iyi nama, ugaragaza ko hakenewe byihutirwa ibiganiro bihamye ndetse n’ubufatanye mu gukemura ibibazo bibangamiye amahoro n’umutekano ku mugabane wa Afurika.

Ni muri urwo rwego, Thabo Mbeki Foundation itegura iyi nama ngarukamwaka ikaberamo ibiganiro ku mahoro n’umutekano muri Afurika bigamije gutanga ibitekerezo by’ingenzi ku bisubizo bifatika byaganisha uyu mugabane ku mahoro n’umutekano birambye.