Imbuto Hub igenewe gutanga amahugurwa y’imyuga, guteza imbere siporo, uburezi, kwita ku bana bato ndetse na serivisi z’ubujyanama ku buzima n’imibereho myiza. Byitezwe kandi ko kizajya gitanga serivisi zitandukanye zizagirira akamaro abaturage b’aho giherereye.

Imbuto Hub ni igikorwa remezo gifite ibyumba 20, byubatswe mu buryo butuma habera ibikorwa byinshi icyarimwe. Harimo ahakorerwa imyitozo ngororamubiri, imikino njyarugamba nka Karate, umupira w’amaguru, basketball, handball, kubyina Kinyarwanda, isomero, irerero ry’abana, ibyumba byigishirizwamo imyuga irimo ubudozi, kogosha, gusuka n’ibindi bijyanye no kwita ku bwiza, icyumba cy’ubujyanama ku buzima n’imibereho myiza, ndetse n’igenewe ikoranabuhanga.

Nubwo kibanda ku rubyiruko, gifasha n’abageze mu zabukuru. Mu masaha ya nimugoroba bahakorera imyitozo ngororamubiri ijyanye n’ubushobozi bwabo, ibafasha gukomeza ubuzima bwiza, kuruhura imitsi no gusabana, bityo bikabarinda kwigunga n’irungu.

Bamwe mu rubyiruko rumaze amezi atatu rukoresha Imbuto Hub, by’umwihariko abaturuka mu Mirenge ya Nyamata, Ntarama na Mayange, bavuga ko ari ahantu h’ingenzi habafasha guteza imbere impano zabo no kunguka ubumenyi butandukanye.

Mujyawamariya Sylvie ni umwe mu rubyiruko rwacikirije amashuri rwitabiriye igikorwa cyo gufungura ku mugaragaro Imbuto Hub Mu Bugesera umaze amezi atatu yiga ibijyanye no gukora n’ubwiza bw’abakobwa.

Yagize ati "Ibyo ndimo kuhigira birimo kugenda bimpindurira ubuzima, amafaranga make mbona amfasha mu bikorwa bitandukanye, ariko bingaragariza ko igihe nzaba maze kwiga nzashobora gukorera menshi akazamfasha n’umuryango wanjye."

Yakomeje agira ati "Imbuto Hub turabashimira cyane, niyemeje ko amahirwe nahawe ntazayapfusha ubusa, nzayakoresha ku buryo mfasha umuryango wanjye n’Igihugu cyanjye."

Mu mezi atatu ashize kuva Imbuto Hub yatangira gukora, yakiriye nibura urubyiruko 200 ku munsi. Muri icyo gihe, abantu barenga 960 bamaze gukoresha isomero, 875 bahawe serivisi z’ubujyanama ku buzima n’imibereho myiza, 117 bakora imyitozo ngororamubiri ku buryo buhoraho, mu gihe abana 1,402 bamaze gukoresha irerero ry’abana.

Imbuto Hub ni igitekerezo cya Imbuto Foundation, gitangirijwe mu Karere ka Bugesera, ariko kizagezwa mu turere twose tw’u Rwanda mu rwego rwo gufasha urubyiruko kubona ibikorwa remezo bibafasha mu mikino itandukanye, n’ibindi birimo kwiga imyuga n’ikoranabuhanga.