Ni bimwe mubyo ubuyobozi bwa PDI bwagarutseho kuri uyu wa gatatu tariki 26 Kamena 2024, mu Karere ka Rwamagana ubwo bari mu bikorwa byo kwamamaza umukandida wa FPR-Inkotanyi ku mwanya w’Umukuru w’Igihugu Paul Kagame bahisemo gushyigikira no kwamamaza kuri uwo mwanya ndetse no kwamamaza abakandida ba PDI bahatanira kuzahagararira iryo shyaka mu Nteko Ishinga Amategeko.

Ubuyobozi bwa PDI buvuga ko bwahisemo gutangira ibikorwa byo kwiyamamaza ndetse no kwamamaza umukandida bashyigikiye ku mwanya w’Umukuru w’Igihugu, kuri uyu munsi kubera ko aribwo uwo bashyigikiye kuri uwo mwanya yari yaruhutse kuko ubusanzwe baba bari kumwe aho agiye kwiyamamariza, ndetse bahitamo gutangirira mu Karere ka Rwamagana ahahurijwe Uturere twose tw’Intara y’Iburasirazuba.

Ubusanzwe baba wa Taifa ni ijambo riri mu rurimi rw’Igishwahili ugenekereje mu Kinyarwanda ni nko kuvuga ’Umukuru w’Igihugu w’Ikirenga’, aho mu bihugu nka Tanzania bikoreshwa ku wabaye Perezida wa mbere w’icyo gihugu, Julius Kambarage Nyerere ufatwa nk’inkingi y’iterambere ry’icyo gihugu, kimwe no kuri Nelson Mandela wahoze ayobora Afurika y’Epfo ufatwa nk’Umuyobozi Mukuru w’Ikirenga w’icyo gihugu.

Agendeye ku bikorwa by’indashyikirwa Perezida Paul Kagame yakoreye u Rwanda n’Abanyarwanda, Perezida wa PDI Sheikh Mussa Fazil Harerimana avuga ko asanga akwiye kwitwa baba wa Taifa ku buryo n’igihe yazasimburwa yajya afatwa nk’Umuyobozi Mukuru w’Ikirenga w’Igihugu.

Ati “Aho aba Perezida bazaza nyuma ye batandukaniye nawe ni uko hari imisingi ashyizeho batazahura nabyo, icya mbere mu bimugira baba wa Taifa ntibazahagarika Jenoside byararangiye, icya kabiri ni ukubanisha Abanyarwanda nyuma yo guhagarika Jenoside yakorewe Abatutsi, niba tugeze kuri 94% mu myaka ibiri tuba tugeze 96%, ubwo bumwe bwacu ni inkingi imuhindura baba wa Taifa.”

Arongera ati “Uburezi bwa buri wese kugera ku mashuri 12, ababyeyi bagahabwa nkunganire, bo bakagira uruhare mu kugaburira abana no mu bikoresho by’ishuri, ntawe uzaza ngo abivaneho, uwo ni umusingi ashyizeho, ni baba wa Taifa.”

Ibyo n’ibindi byinshi ngo nibyo byatumye PDI ihitamo Paul Kagame nk’umukandida uzabahagararira ku mwanya w’Umukuru w’Igihugu, ariko kandi bakanasaba Abanyarwanda ko nyuma yo kumutora kuri uwo mwanya bazagirira iryo shyaka icyizere bakaritora rikabona intebe mu Nteko Ishinga Amategeko, bizarifasha gukurikirana uko imigabo n’imigabo y’uwo bashyigikiye ku mwanya w’Umukuru w’Igihugu ishyirwa mu bikorwa.

Grace Ishimwe ahagarariye urubyiruko mu Ntara y’Iburasirazuba akaba n’umwe mu bakandida ku mwanya w’ubudepite muri PDI, avuga ko ari ishyaka ryiza ry’ubumwe bw’Abanyarwanda kubera ko batavangura bashingiye ku idini cyangwa ikindi.

Ati “Urubyiruko rwa hano twese turiteguye, Uburasirazuba bwose turamamaza Perezida wa Repubulika Paul Kagame, tuzi gukomera kwe, tuzi ibyo yatugejejeho, ntacyo tutabona mu Turere twose, Rwamagana dufite ibitaro, Kayonza hari Zipline, Nyagatare hari hoteli y’icyitegererezo, Bugesera y’Ubudasa murabizi umuntu ayitiranya na Kigali, niyo mpamvu tariki 15 z’ukwa karindwi jye n’urubyiruko rwose mpagarariye twiteguye kuzatora ku gipfunsi kugira ngo akomeze kugeza ibyiza ku Banyarwanda.”

Arongera ati “Nyuma yo gutora umukuru w’Igihugu ndagira ngo nsabe abantu bose ko ku mwanya w’Abadepite mwazatora PDI, muzabona ikirango kiri mu cyatsi cyibisi, umunzani uriho uvuga ubutabera kuba nkuhagararaho ntitandiye undi akawuhagararaho yitandiye ntujya uhengama uhora ureshya.”

Abarwanashyaka ba PDI bavuga ko biteguye gutora Kagame Paul ku mwanya w’Umukuru w’Igihugu ndetse bakazatora ishyaka ryabo kugira ngo bahe amahirwe abakandida baryo 55 bari kuri lisite yemejwe na komisiyo y’Igihugu y’amatora kuzabona amahirwe yo kuba abadepite mu Nteko Ishinga Amategeko, kugira ngo bakomeze gutanga umusanzu wabo mu kubaka igihugu muri manda y’imyaka itanu iri imbere.