Muhanga: Barashima FPR yasigasiye ubumwe bw’Abanyarwanda

Abaturage bo mu Karere ka Muhanga mu Murenge wa Nyarusange barashimira Nyakubahwa Paul Kagame na FPR-Inkotanyi, baciye amacakubiri mu Banyarwanda bakimika Ubumwe bw’Abanyarwanda.

Babitangarije mu gikorwa cyo kwamamaza Umukandida wa FPR-Inkotanyi, ku mwanya wa Perezida wa Repubulika n’Abadepite mu Nteko Ishinga Amategeko, aho bagaragaje ko kuri Repubulika ya mbere n’iya kabiri, Abanyarwanda barimo ibice byanabagizeho ingaruka za Jenoside yakorewe Abatutsi.

Kanyanzira Frederic avuga ko ashimira FPR-Inkotanyi yamuhuguye akabona imibereho yo kwiteza imbere, yiga umwuga w’ubudozi, arabukora akaba afite aho adodera imyenda irimo n’iy’abageni bimufasha gutunga Umuryango we.

Nyamara ngo Gahunda y’iringaniza yakoreshwaga mu gihe cya Repubulika ya kabiri, yatumye atarangiza amashuri, kandi yarumvaga azaba padiri ariko ntabwo byari gushoboka, ashatse no kwiga ngo abe umuganga, ariko nabyo ntibyakunda kubera iyo politiki y’iringaniza.

Agira ati, "Gahunda y’iringaniza yatumye ntarangiza amashuri, numvaga nzaba padiri ariko ntabwo byari kwemera, nashatse no kwiga ngo mbe umuganga, ariko nabyo ntibyari gukunda kuko nabwo iringaniza ryantambamiye, ariko nize umwuga umaze kunteza imbere".

Avuga ko ashimira FPR-Inkotanyi yashyigikiye ubumwe n’ubwiyunge bw’Abanyarwanda, ubu bakaba babanye neza batakigerwaho n’ingaruka z’ivangura n’irondakarere ryatunye adindira, kandi akaba agira uruhare mu guhuza Abanyarwanda nyuma y’uko atowe nk’umurinzi w’Igihango wagize uruhare mu kurokora Abatutsi bahigwaga muri Jenoside yakorewe Abatutsi.

Agira ati, "Abaturage benshi baza bashaka ko tubakemurira ibibazo bagashaka no gutanga ruswa ngo bikemuke mu buryo butari bwo, ariko njyewe narabananiye, nk’ukurinzi w’Igihango ushyigikiye umutima w’ubushake kuko ari byo bizatuma u Rwanda ruba Kanani baririmba koko".

Chairperson w’Umuryango FPR-Inkotanyi mu Karere ka Muhanga, Kayitare Jacqueline avuga ko gutora Paul Kagame ari ukongera amahirwe yo kubona ibyiza by’imiyoborere, kurengera abagore n’urubyiruko, gufasha abageze mu zabukuru gusunika iminsi ari nayo mpamvu asaba Abanyamuryango ba FPR gutora Paul Kagame.

Abakandida Depite biyamamariza mu Karere ka Muhanga, bavuga ko nibagera mu Nteko Ishinga Amategeko, bazakomeza gufasha Paul Kagame guteza imbere ibikorwa bifasha abaturage kwiteza imbere, kandi abasindagizwa bakagera aho bakifasha no kwiteza imbere.

Bahamya ko gutora Paul Kagame ari ugukomeza guteza imbere umutekano w’u Rwanda, nk’uko yaharaniye ko u Rwanda rubohorwa, kandi rukwiye gukomeza kubaho.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka