Umukozi wa NEC ushinzwe gutangaza amakuru y’urwo rwego, Moïse Bukasa Karani, avuga ko kugeza ubu urutonde rw’abemerewe gutora ruriho amazina n’imyirondoro by’Abanyarwanda hafi miliyoni 9 n’ibihumbi 500.

Ni nde uri kuri lisiti y’itora kugeza ubu?

Bukasa avuga ko umuntu wese ufite indangamuntu y’u Rwanda kandi wujuje imyaka 18 agomba kugenzura ko ari no kuri lisiti y’itora kuko Komisiyo y’Amatora ikorana n’Ikigo cy’Igihugu gishinzwe Indangamuntu (NIDA), aho abantu bose bujuje imyaka 18 y’amavuko bahita bashyirwa kuri iyo lisiti.

Bukasa yagize ati "Abafite imyaka 18 bose twebwe turabakoporora(extracting and importing) dukoresheje ikoranabuhanga, bakaza kuri lisiti y’itora, ni ukuvuga ko ufite Indangamuntu kandi yujuje imyaka 18 wese tuba tumufite kuri lisiti y’itora."

Icyakora Bukasa yongeraho ko iyo lisiti ngo ibanza gukorerwa ikosora, kuko hari abujuje ibyo byombi ariko barapfuye cyangwa harimo amazina y’abahamijwe n’inkiko ibyaha biremereye.

Ni nde utemerewe gutora?

Umuntu utemerewe gutora ni ufite imiziro inyuranye, nk’uri mu igororero (gereza) cyangwa utarahanagurwaho ibyaha n’inkiko, bijyanye na Jenoside cyangwa ibyibasiye inyoko-muntu, ubwicanyi, ubuhotozi, gufata abagore ku ngufu no gusambanya abana.

Bukasa yagize ati "Muri gereza nta biro by’itora bihaba." Ibyo bivuze ko abari yo batemerewe gutora.

Undi muntu kugeza ubu utazashobora gutora, ni udafite Indangamuntu azerekana kuri site y’itora, kuko ari yo yonyine buri wese agomba kwitwaza agiye gutora, nyuma y’uko amakarita y’itora atagikoreshwa.

Na none abantu batazashobora gutora biboroheye n’ubwo baba bari kuri lisiti y’itora, ni abazajya gutorera aho batiyandikishije. Birabasaba kureba aho bazatorera no kwiyimura hakiri kare bakoresheje telefone, mu gihe aho babarurirwa hatabanyuze.

Ni bande bemerewe gutorera aho bageze hose?

Komisiyo y’Igihugu y’Amatora ivuga ko kugeza ubu imigereka itemewe, nta muntu uzajya gutorera aho atiyandikishije, kereka abantu bamwe bafite inshingano zihariye.

Abemerewe gutorera aho bageze hose, ni abasirikare, abapolisi, indorerezi z’amatora, abaganga n’abanyamakuru, kuko bitabashobokera kuba ahantu biyandikishije kuzatorera.

Ni gute wamenya ko uri kuri lisiti y’itora, aho uzatorera n’uburyo wakwimuka?

Kugeza ubu harimo gukoreshwa telefone, aho umuntu akanda *169# agakurikiza amabwiriza, agahita abona ko ari kuri lisiti y’itora, akamenya site azatoreraho, ariko yabona ko aho azatorera hatamworoheye agakanda iyo mibare akiyimura ajya aho yifuza.

Umukozi wa NEC yakomeje asobanura ko abifuza kwimuka aho bazatorera batagomba kurenza tariki ya 29 Kamena uyu mwaka, kuko nyuma yaho bizaba bidakunda.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2640 )