Impamvu yateye uyu mukobwa gushaka gutwika inzu y’umuryango we ngo ni uko yananiwe kwihanganira uburyo abanye n’umuryango we; ngo ku bwe abona utamubaniye neza kugeza ubwo yifuza kubavutsa ubuzima.

Abakurikiranira hafi ubuzima bw’uyu mukobwa ariko bavuga ko Patience yafashe icyo cyemezo nyuma yo kugurisha frigo y’iwabo batabizi maze yabona iperereza riri bumwerekane agashaka kujijisha.

Passy Sweet (nk’uko yiyise ku rubuga rwa facebook) aherutse kugurisha frigo y’iwabo ku muturanyi amubwira ko yayihawe na nyina mbere y’uko ajya hanze y’igihugu. Se umubyara yaje gushakisha iyi frigo kuko yabonaga yabuze mu buryo budasobanutse. Nya mukobwa abonye se yitabaje abashinzwe umutekano yahise atangira gutera hejuru kuko yari azi ibyo yakoze.

Yatangiye kuvuza induru nk’umusazi avuga ko ise amubuza uburenganzira bwe. Nyuma y’ibyo rero yahise asohoka iwabo yiruka ari nako akomeza kuvuza induru, ajya gushaka umukarani amuguza amafaranga 3000 ajya kugura lisensi (essence) kuri sitasiyo iherereye mu Gatsata hafi ya guest house.

Amaze kugura lisensi yasubiye mu rugo agenda avuga ko agiye gutwika se na bene nyina bavukana munda ngo kuko bamubuza uburenganzira bwe nk’uko byasobanuwe n’abari bari ahari. Ku bw’amahirwe Imana yakinze akaboko abashinzwe umutekano barahasesekara bakoma mu nkokora umugambi mubisha yari agiye gukora.

N’ubwo abashinzwe umutekano bamwatse iyo lisensi (essence) yari agiye gukoresha ayo mahano induru yari ikiri yose kuko uyu mukobwa yakomeje kugaragaza ko atishimiye ibyo se na bene nyina bamukorera. Hagati aho, uyu mukobwa ntiturabasha kuvugana na we gusa turakomea tubikurikiranire hafi.

Umukobwa Imfurayase Patience akunze kugaragara cyane mu mashusho y’indirimbo z’abahanzi benshi harimo Amazi magari ya Mani Martin, Stamina ya Eddy Kenzo, iya Uncle Austin n’izindi.

Uyu mukobwa agaragara nk’ukunzwe cyane kuko ku rubuga rwa Facebook aho akoresha izina rya Passy Sweet afite inshuti zigera hafi ku bihumbi bitanu.

Keza Clemence